Ni 21.11.2020-a Phaizau khuaten Tut luia an humhalh Saitlan li/Ngawi dawh lia phalna nei loa bomb hmanga sangha man a puh, H.Lalzirliana, MLA leh a thawhpui mi 11 zinga 4-te chu 20.5.2022 khan court-in thiam loh a chantir a, mi dang 8-te chu thiam a chantir thung a, thiam loh chantirte hremna chu ni 3.6.2022-ah ngaihtuah a ni ang.
Court thuremnaa tarlan a nih danin, ni 29.11.2020 khan Phaizau VC leh NGO-te thuchhuah inṭawm chu social media-ah a darh a, chutah chuan H.Lalzirliana, MLA leh a thawhpui mi 11-te chu ni 21.11.2020-ah Tut luia Saitlan li/Ngawi dawh li, khawtlang humhalh laiah phalna nei loa bomb hmanga sangha an man avangin ₹10,000/- chawi tura phût an ni.
Hemi chungchang hi forest department chuan a chhui chiang nghal a, he thil thlenna hmun hi reserved forest huam chhung a nih avangin MLA leh a thuih-hruaite hian section 23 (1) leh 24 (6) Mizoram (Forest) Act, 1955 an bawhchhe ngei niin an hria a, DFO Mamit chuan complaint thehlutin court-in complaint a dawn ni chu 14.12.2020 a ni.
Thubuai ngaihtuah laiin sawrkar thuhretu mi pali thu zawhfiah an ni a, thubuai neite chuan thuhretu an nei lo thung a, thubuai neite chu Sec. 313 Cr. PC hmangin insawifiahna hun siamsak an ni a, an vaiin puhna zawng zawng an phat vek laiin, insawifiahna emaw an tih lohzia finfiahna emaw engmah an sawi lo a ni.
Court-in ngun taka finfiahna (evidence) awmte a zirchian hnuin ni 21.11.2020-ah H.Lalzirliana, MLA leh a thawhpui mi 11-te chu Tut luiah an kal ngei a, an zinga mi ṭhenkhat chuan Saitlan li/Ngawi dawh li-ah kalin gelatine hmangin sangha an bomb ngei tih an pawm a, sangha bomb-na hmun hi rerserved forest chhung ngei a ni tih finfiah a ni bawk.
VC leh All NGO phût angin thil tisuala puh (accused) ṭhenkhat chuan chawi tura phut ₹10,000/- an pe ngei a, khawtlangin chawi tura an phût pek chungchang hi thil tisuala puh (accused) no 1-4, an vaiin Mamit-a mite chuan an hriatpui loh thu an sawi vek a, thil tisuala puh (accused) no 5-12, an vaiin Phaizau khuaa mite chuan an pek ngei thu an pawm thung a. VC leh khawtlang hruaitute hnena ₹10,000/- petute chu Hreuthangpuia, Chuau-thantluanga, Lalrikhuma, Lalchawimawia leh Chanchinmawii-te an ni.
Khawtlangin Saitlan li/Ngawi dawh lia sangha bomb nia an puh avanga pawisa chawi tura an tih, pawisa lo chawitute chu puh an nihna chu pawmtlakah ngaiin, thiam loh chantir (convict) an ni a. Pawisa chawi tura an phut an pek chhan chu phalna loa bomb hmanga sangha an man nia puhna an pawmzia lantirnaah court chuan a ngai a, pawisa chawitute zinga tel Chanchin-mawii chu DFO, Mamit Forest division hmaa a thusawi leh thubuai nei dangte thusawiah Saitlan li/Ngawi dawh lia a kal thu leh, sangha a bomb ve thu a lang lo a, chumi vang chuan thiam loh chantir zingah a tel ve lo thung.
Court chuan chanchinbua thuchhuah te, pawl ṭhenkhat press release te leh social media hmanga thuchhuahte chu thubuai neite thiam loh chantirna tur chhan tlingah a ruat lo a, chuvang chuan finfiahna ṭha tawk awm lo nia ngaiin benefit of doubt a pe a, thiam loh chantir mi palite bak mi dang pariatte chu thiam a chantir a, thiam loh chantirte hremna chu 3.6.2022-ah court-in a ngaihtuah ang.
-Zalen