Zothlifim Logo
Loading ...

Inrinni khan Union Minister of State for Education and External Affairs Dr. Rajkumar Ranjan Singh chuan Mizoram University-a Research Scholars’ Hostel leh Faculty Development Centre a hawng.

Union MoS Dr. Rajkumar Ranjan Singh chuan thu sawiin Research Scholars’ Hostel leh Faculty Development Centre hawng tura sawm a ni chu lawmawm a tih thu sawiin, MZU chuan kum 2022 Impact Ranking a neih phak avangin a chhuang hle tih a sawi a, MZU chu India ram chhunga National Education Policy 2020 hmang hmasa pawl University a nih avang pawhin a lawmpui thu a sawi a, University hamṭhat nan central sawrkar chauh hmalakna a tawk loh thu leh state sawrkar nena thawhona ṭha a pawimawh tel thu a sawi bawk a, Mizoram University, South Campus hmalakna chungchanga harsatna an tawhte chu a hriatpui thu leh a fel thuai theih nan hma a lakpui tur thu a sawi.

Mizoram University Vice Chancillor Prof. KRS Sambasiva Rao pawhin thu sawiin, MZU chu India rama research project hmu hnem ber pawl a ni tih tarlangin, Covid-19 pandemic chhungin cheng vaibelchhe 100 chuang hmuh a ni tih a sawi a, North East chhunga University project hmu hnem thei ber a ni tih a sawi bawk a ni. Covid chhungin MZU chuan webinars, seminars leh meeting 700 chuang a buatsaih theih thu leh India ramah pawh research papers publish hnem ber leh ṭha ber pawl a nih thu a sawi a, ram University zinga upa lo tak ni mahse ṭha ber pawl a nih thu a sawi.

Reseach Scholars Hostel hi NEC fund niin, cheng vbc. 5.9 senga kum 2016-a sak ṭan a ni a, a zau zawng hi 435 Square metre a ni a, Research Scholars (girls) 78 an leng a, Room 39 a awm a, room khatah scholar pahnih zel an awm thei dawn a, Ground floor bakah floor pathum dang a awm bawk a ni.

Faculty Development Centre hi Ministry of Education hnuaia sak a ni a, Pradan Madan Mohan Malviya National Mission on Teachers and Teaching hnuaia sak niin kum 2019 July khan sak ṭan a ni a, cheng vbc. 3.14 senga sak niin, kum 2021 December khan sak zawk a ni a. Floor thum nei Building a ni.

Union Minister of State hian MZU a kal hmain Pachhunga University tlawhin campus a hmunah kalin a en a, a thawktute nen inkawmna hun tawi a nei bawk a ni.