Skip to content
Home » Chanchinthar » ASF-in ziaawm lam la pan hlei thei lo

ASF-in ziaawm lam la pan hlei thei lo

Mizorama Vawk pul hri leng mek, African Swine Fever (ASF) chuan ziaawm lam a la pan thei lova, a thawh hnihna kumin March thla vel aṭanga leng leh avangin Mizoram pumah Vawk 5488 a thi tawh.

AH & Vety Dept chhinchhiah danin, Inrinni khan vawk 93 thih belh leh in, ASF kai ni ngei a rinhlelh vawk 81 suat a ni bawk a, heti hian Mizoram pumah Inrinni thleng khan ASF hri vanga vawk 5488 a thih tawh bakah vawk 4636 suat a ni tawh bawk a ni.

AH& Vety Department chuan vawk hri hian Mizoram district zawng zawng a tuam tawh tih sawiin, thingtlang hmun 74 ah hri hi a leng mek a, hri lenna hmun rinhlelh 44 a awm mek bawk a ni.

Mamit Luangpawl veng chhung National Highway 44A kawr a vawk thi paih a nih avangin Luangpawl Village Council hruaitute chuan Inrinni khan Mamit Police station-ah FIR an thehlut a. Mamit-ah hian a vawk pul hri leng mek chuan zual lam a la pan zel a, vawk thi a la pung chho zel a, vawk thite hi Mamit Joint Village Council ruahmannain Zo-ngawah vawk thlanmual siamin phum ṭhin a nih laiin, NH44A kawng kam kawr, Luangpawl veng chhung mihring chenna aṭanga hnai tak, mihring leh ran vulh tana him lohna hmun a paih a nih avang te, Mamit DC-in vawk thi reng reng phum tura thupek a lo chhuah tawh zawm loh a nih avang te, vawk phumna tur hmun awm reng laia hetia veng chhunga paih a nih avangtein a titute zawng chhuak a, dan anga hremna pe turin Mamit police-te an ngen a ni.

Mamit khawpuia vawk pul hri avanga vawk thi 717 zinga vawk 235-te chu vawk pul hri kai avanga suat an ni.

Leave a Reply

This site uses Akismet to reduce spam. Learn how your comment data is processed.