Deputy Speaker leh Tuikum Bialtu MLA ni bawk Er.Lalrinawma chuan Zirtawpni khan a bial chhung Ngentiang leh Baktawng khuaa MLA Fund hmanga thawh Helicopter ṭum hmun tur Helipad a hawng.

Heng Helipad pahnihah te hian Er. Lalrinawma hova Helicopter hi ṭumpui chhin (trial landing) a nih hnuah a hawnna inkhawm tawi buatsaih zui ve ve a ni a, Er.Lalrinawma chuan Helipad hmun tur ram phal taka petute chungah lawmthu sawiin, ṭha taka enkawl a, mamawh huna ṭangkai taka hman theiha a awm reng theih nan a enkawl zui kawngah mipuiten mawhphurhna pawimawh tak an nei tih a hrilh a, zinna tinah hman reng theih ni lo mahse leilung chhiatna rikrum thilah te, Medical emergency thilahte a ṭangkai em em a ni tih hre reng turin Helipad thar neitu khaw hnih mipuite a chah a ni.

Lalsangpuia, Dy. Controller GAD (Aviation wing) pawhin thu sawiin, sawrkar laipuiin ram mipui zawng zawngte chu tam zawka thlawhna hmang ṭhin turin a duh a, a senso lamah pawh 75% hi central sawrkarin a tum ṭhin a, 25% hi state lamin an tum ve chauh a ni, a ti a, Aviation chuan ram chhung hmun kilkhawr zawkte a theih chin chinah tlawh chhuah theih an tum tih a sawi bawk.

Ngentiangah hian Helipad hawnna pualin khawtlang huapin ruai an ṭheha, an khaw ṭhenawm mipuiten an telpui a, Baktawng Helipad hawnaah pawh hian khawtlang mipui ṭhahnem tak an tel a ni.