State Level Bankers Committee Mizoram hruaitute chuan pawisa note hmang lova Digital payment kaltlanga pawisa inpek chu a him ber a, hetihlai hian Mizoramah chuan Digital payment hmanga sum inpek tawn chu duh anga kalpui a la ni rihlo tih an sawi.
Aizawl Press Culb-a thuthar lakhawmtute an kawmnaah State Level Bankers Committee hotute chuan Mizoramah chuan a tam zawkin Bazara thil an leiin pawisa note an la hmang zawk nia an hriat thu an sawi a, hemi chungchang-ah hian Bank hotute chuan Aizawla dawrkai lian zual AMC-a inziak lutte internet kaltlanga Digital Payment kalpui thei survey an neihah dawrkai lian zingah zaa 95 vel chuan digital payment hmang hian pawisa dawn leh thawnchhuah an kalpui thei tih an sawi a, pawisa inthawn nan Bank lamin an siam Digital Payment Application-te chu a him thu an sawi bawk.
State Levels Bankers Committee Mizoram hruai-tute chuan India ram zalenna kum 75-na lawmna kal zelah Bank kaltlanga sawrkar hmalakna puanzarna hun Iconic Week chu chawlhkar thar lo awm tur June ni 6 aṭanga ni 11 inkar hian hman a nih tur thu leh a hawnna chu June ni 6-ah Lok Sabha MP C.Lalrosanga hovin Aizawlah neih a ni dawn tih an sawi bawk.