Nimin khan Serchhip District Disaster Management Authority Chairman, Nazuk Kumar, IAS, Serchhip bawrhsap ni bawk chuan tun hnai ruahsur nasa vanga Serchhip leh a chhehvela leiminna hmun hrang hrangte a tlawh kual.
District Bawrhsap hiadin n Chhiahtlang aṭanga bul ṭanin Chhiahtlang NH-54 Bypass Road Retaining Wall chimna lai te, Serchhip leh Chhiahtlang inkara kawng laih zauh vanga leiminnate a en a, chumi hnuah Serchhip P&E venga lei minna hmun te, Serchhip Dinthar venga NH-54 kawngpui tlahniam thar te leh Dinthar Veng hmun ṭhenkhat panna leiminin a hnawhpin te, Darnam venga Telecommunication Tower panna kawng laihna leivung tawlhin NH-54 a hnawhna hmunte leh he leimin vanga Chhanghnuna in ṭhiah tak hmunte a tlawh a, Chhang-hnuna hi Sailiam kohhran Presbyterian Biakin Choka-ah a invawm lut rih a ni.
Sailiamkawna Horticulture Department Ware House leh Cold Storage sira leiminin an Power line a tihchhiatte, an Ware House building dinhmun him lo deuh nia langte a en bawk a ni.
Heng harsatna thlenna hrang hrangte hi a tam zawk chu NH-54 laih zauh hna thawh mekin a nghawngte an nih hlawm avangin Nazuk Kumar hian NHIDCL hotute chu a rang lama a theih ang ang thianfai turin a hrilh a, chawp leh chilha a invênna hna thawh theih ang angte chu a rang lama ûmzui a nih tur thu sawiin, Horticulture Department Ware House bik chu Horticulture hotute nena hmalak zui zel dan tur sawiho a tum thu a sawi bawk a, Silpauline a khuh hul ṭulna hmunte hnenah Silpauline an pe nghal bawk a ni.
District Bawrhsap hi Lalmuansanga Ralte, Addl. DC, Kaste Romalsawma, SDPO, Lalzikpuii, SDO (Sadar), Vanlalduhi Ralte, DM&R District Organiser, NHIDCL hotute leh an hnuaia Contractor-te leh mi pawimawh dangten an ṭawiawm a ni.