Skip to content
Home » Chanchinthar » ‘District Working Committee on Ruihhlo Do’ din nise ti

‘District Working Committee on Ruihhlo Do’ din nise ti

State Working Committee on Ruihhlo Do chu an Chairman Dr. K.Beichhua, Excise Minister hovin nimin khan a vawi khatna atan SAD Conference Hall, MINECO-ah an ṭhukhawm a, State level bakah District tinah Working Committee din ni se tiin an rel.

Dr K.Beichhua chuan Mizoram chhungah nasa taka ruihhlo a hluar avangin ṭangrual a, tihtakzeta do let a ngai tih meeting-ah hian a sawi a, vawi leh khatah tihrem vek thei nilo mah se, a hluar lutuk tihziaawm chu hna pawimawh hmasa a ni, a ti a, sawrkarin a do let tur Working Committee a din chuan theihtawp chhuahin hmalak an tum tih a sawi a ni.

Meeting huan District Working Committee on Ruihhlo Do-ah hian DC tin te Chairman ni se, member atan a kaihhnawih department aiawhte bakah tlawmngai pawl hrang hrang te ruat ni se an ti a, Khua leh veng tinah Village Level Task Force din ni se an ti bawk a, member atan Local Council, kohhran, tlawmngai pawl te leh veng/khaw tinin telh ṭul an tih ang ruat ni se, heng member kalkhawmte hian an Chairman tur leh hruaitu dangte thlang se tiin meeting-ah hian rel a ni bawk.

Task Force te kaihruai-tu tur, an thuneihna leh kal-phung tur duang turin nimin meeting hian action plan & guidelines siam tur committee a ruat a, he committee-ah hian Excise Department, police, health, Social Welfare leh Central YMA aiawhte an tel dawn a ni. State Working Committee aṭanga Village Level Task Force thlenga sum leh pai mamawh tur duanchhin chu nimin meeting-ah hian thlir a ni bawk a, Budget atan cheng vbc. 7 chu pawm niin, hei hi sawrkarah thlen leh tur a ni.

Leave a Reply

This site uses Akismet to reduce spam. Learn how your comment data is processed.