Deputy Chief Minister Tawnluia chuan nimin khan 23 Sector Assam Rifles ten an buatsaih Ruihhlo Dona atana campaign ‘Anti Drugs Awareness Campaign’ chu Loch Hall, Assam Rifles hmunpui Lammual-ah a khar.
Campaign kharna-ah hian Deputy Chief Minister chuan thu sawiin ruihhlo dona kawnga thawktute zawng zawng chungah lawmthu sawiin, ram hmel tibawlhhlawh thei leh mihring nunphung tibuai thei ruihhlo chu mitinin kan do a ṭul a ni, a ti a, Sawrkar, Kohhran leh NGO hrang hrang te bakah Assam Rifles-ten ṭhahnemngai taka ruihhlo dona kawnga hma an lâkna chu ropui a tih thu sawiin, dân loa ruihhlo zuar leh ruihhlo ngaiten an sim theih nana thawkhoa, inṭanpui tlâng a, Zoram nuam siam turin kalkhawmte a sawm a, Deputy Chief Minister chuan ruihhlo dona kawngah sawrkar, kohhran leh pawl hrang hrang bakah Assam Rifles-ten an hma zawn ṭheuha ruihhlo do nana nasa taka hma an la chu tuna aia nasa leh zawka kalpui a ngai a ni, a ti a. 23 Sector Assam Rifles te an kal zelna turah duhsakna a hlan bawk a ni.
Tawnluia chuan Lunglei Bikers’ Association leh Mizo Students’ Union te hnenah Anti-Drugs Awareness Campaign puala Lunglei atanga Aizawl thleng bike rally an neih avangin citation a hlan a. Ruihhlo ngaite tanpui kawnga ṭhahnemngai taka thawktu Dr RL Sanghluna, Synod Hospital; Zothanpuii, Director Agape Centre leh Lalduhawma Chawngthu, President, MDUF-te hnenah citation a hlan bawk a, anni bakah hian Anti-Drug Awareness Campaign denchhena painting competition-a tel school naupang te hnenah lawmpuina a hlan nghal bawk a ni.
Anti-Drugs Awareness Campaign hi June ni 7 khan hawn a ni a, kar hnih chhung a awh niin, chhawng thumin buatsaih a ni a, ṭhalaite tinzawn a ni.