Deputy Speaker Er. Lalrinawma, Tuikum bialtu MLA ni bawk chuan imin khan a bial chhunga awm, Hmawngkawn khuaah Health Clinic Centre a hawng.
Er. Lalrinawma chuan a bial chhunga Health Sub-centre awm lohna khua – Vanchengte, Hmawng-kawn, Darlawng, Phulmawi, Chhiahtlang North leh Mualpui Chhingchhipahte sawrkarin Health Clinic Centre dah tura hma a la chu a lawmawm a tih thu a sawi a, Chief Minister, Health Minister leh sawrkar chungah lawmthu a sawi a ni.
Dy. Speaker chuan Mizorama Sub-centre awmsa engemawzatte chu Health and Wellness Centre-ah hlan kai an lo tawh tih sawiin, a bial chhunga Sub-Centre-te pawh Health & Wellness Centre-ah hlankai an ni deuh vek tawh tih a sawi a, mipuite hriselna atana sawrkar hmalakna chu a lianin a ropui hle a ni, a ti a. Sawrkar hmalakna kal zelah Sub Centre la awm lohna hmunah Clinic Centre hawngin hma an la chho leh mek tih a sawi bawk.
Hmawngkawna Health Clinic Centre hawn a nih hma hian Buhkangkawnah pawh Health Clinic Centre hawn a lo ni tawh a, Hmawngkawn Health Clinic Centre hawn thar hi sawrkar inpeih hma chu MLA Fund aṭanga Health Worker rawih rih tur a ni dawn a ni.