Zothlifim Logo
Loading ...

Serchhip-a Excise and Narcotics Department chuan nimin khan an hnathawh a hlawhtlinna leh an hnathawktu kaisang te lawmpuina hun an hmang.

Serchhip-a Excise and Narcotics Department Office-a he hun hman ah hian Asst. Commissioner of END B. Ngurchhuana chuan tunhnaiah an hnathawhna kawng hrang hrangah hlawhtlinna an chante tarlangin, hetianga ruihhlo chi hrang hrang an man kawnga thawktute chungah lawmthu a sawi a. Tun dinhmunah ruihhlo chu kan ram tichhetu lian tak a ni tih sawiin, ruihhlo dona chu ram leh hnam humhalhna pawimawh tak a nih thu a sawi a. Hemi kawnga hma an laknaah tlawmngai pawl, kohhran leh thuthar thehdarhtute ṭanpuina an mamawh hle tih a sawi bakah khawtlang pawhin an hmalakna hi an hriatpui a tul thu a sawi a. Ruihhlo chi hrang hrangte chu Dan atanga thlir chuan sual a ni tih sawiin, hetianga kan rama ṭhalaite ruihhloin a tihbuai zel chuan ram ropui kan thlen loh a hlauhawm thu a sawi a, chuvangin ruihhlo laka kan ṭhalaite venhim an nih theih nan theihtawp chhuah tlan a ṭul tih a sawi.

He hunah hian thawk-tute bakah thuthar lakhawm-tu ṭhenkhat an tel a ni.

Serchhipa END-te hian kumin January ni 1 aṭanga June ni 16 chhung khan NDPS Act 1985 hnuaiah thubuai 28 ziaklutin mi 33 an man tawh a, zu khapna, MLP Act 2019 hnuaiah thubuai 110 ziaklutin mi 95 an man tawh a ni.

Hemi hun chhung hian heroin gms. 938.26 leh ganja Kg. 8 an man tawh a, rakzu lits. 2746.05 leh sap zu (IMFL 750ml) bottle 312, zu bilh lai ṭin 737, Apple Wine Lit. 1 leh Beer Can 88 an man tawh a, heng thubuai kaihhnawihah hian lirthei 9 (2-wheeler 2, LMV 6, HMV 1) an man tawh bawk.