Environment, Forest & Climate Change Minister TJ Lalnuntluanga chuan thing leh mau, nungcha, lui leh tuihna venghim turin Mizo mipui zawng zawng thawhho a ṭul a ni a ti.
He thu hi Champhai Zotlanga Botanical Garden siam thar tur bul ṭanna Lungphum a phumnaah sawiin, Minister chuan Mizorama Botanical Garden awmchhun Champhai Zotlangah thing leh mau chi hrang hrang, ramhmul damdawi leh naubante hmun bik awma chin a ni dawn a ti a, Mizoram leh state pawn bakah ramdang a mite pawh a ṭul anga lakhawmin he hmunah hian chinpun a ni dawn tih sawiin, zirlai leh a zirbing mite tana inzirna chhenfak-awm tak siam a ni dawn tih a sawi.
Minister chuan ram ngaw leh nungchate pawimawhna hre thara lui tuite venhim a ṭulzia hriaa hma la thar turin he huna kalte chu a sawm a, a enkawl Department-in hma a lakna piah lamah mi tlawmngai leh tlawmngai pawlte hmalakna fakawm a tih thu a tarlang bawk.
DFO Lalduhthlana sawi danin he Bontanical Garden hi Champhai Zotlang khaw hmun hlui, YMA-ten an lo enkawl ṭhin a ni a, he ram Hectare 21-a zau chu kum 2019 atang khan Botanical Garden tura ruahman ṭan niin, tunah hian cheng nuai 40 sengin chawlhbuk sak a nih bakah a ram hungna te, Inthiarna leh Tuizemte siam a ni a, hemi chhungah hian zir bingna hmun tur interpretation centre te, lenkhawthawnna tur phul hmun te, nauban vawn ṭhatna, Orchid park te siamin Thing leh Mau chi hrang hrangte dahkhawm tum a ni a ti a, kum 4 chhunga ram ngaw chereu Mizoram chhunga zirchianna aṭanga a landanin ram ngaw chereu za zela 64 chu Undivided Champhai District-a thleng a nih thu a sawi bawk.
Botanical Ganden lungphum phumna puala hun hman zawh hian Minister TJ.Lalnuntluanga, Champhai District DC leh SP te, Head of Office te leh Tlawmngai pawl hrang hrang aiawhten thing an phun nghal a ni.