Zothlifim Logo
Loading ...

French Open khelh meka hmeichhe singles-a final khel tur, American tleirawl Coco Gauff chuan champion trophy pahnih hawn theihna chance a nei mek.

Gauff hian Singles final a luh bakah women’s doubles lamah a ṭanpui, Jessica Pegula nen final an lut a, semi-final-ah hian Americans Madison Keys leh Taylor Townsend ṭangdun chu 6-4, 7-6 (7-4)-in an hneh a ni.

Kum 18 mi Gauff hian tun ṭum hi Grand Slam singles final a khelh vawi khatna tur a ni a, Doubles-ah chuan nikum khan US Open-ah final lutin, an champion zo ta lo a ni.

Final-ah hian French pair Caroline Garcia leh Kristina Mladenovic-te ṭangdun an hmachhawn dawn a, Garcia leh Mladenovic-te hian semi-final-ah hian Lyudmyla Kichenok leh Jelena Ostapenko te ṭangdun chu 2-6, 6-4, 6-2-in an hneh a ni.

Womens Singles final hi vawiin tlai dar 6:30-ah an khel ang a, Doubles final hi Pathianni tlai dar 3-ah an khel ang.