Skip to content
Home » Chanchinthar » Governor-in CIJWS, Vairengte, Assam ramri leh Serlui B Hydel Project a tlawh

Governor-in CIJWS, Vairengte, Assam ramri leh Serlui B Hydel Project a tlawh

Nimin khan Mizoram Governor, Dr.Hari Babu Kambhampati chuan Vairengtea sipai nunchan zirna hmun, Counter-Insurgency and Jungle Warfare School bakah Vairengte khua, Assam leh Mizoram inrinaa CRPF duty-na hmun leh Serlui B Hydel Project-te a tlawh.

Governor-in nimina CIJWS Information and Research Centre a tlawh-naah hian Major General Rajiv Thapar, Commandant chuan CIJWS kalphung leh sipai hnena zirtirna an pek dan tlangpui tarlanna hun a hmang a, râl lemchan entirna hun neih a ni bawk.

Governor hian Vairengtea CRPF duty-na hmun, Ground Zero tlawhin, Shah Nawaz Khan, DIG, CRPF, Silchar-in a lo dawngsawng a, he hunah hian H.Lalengmawia, Commissioner, Home Department-in telpuiin ram mipuite ngaihsaktu Governor Mizoramin a nei chu thlamuanthlak a tih thu leh ramri venghimtute tan pawh phurna nasa zawk a thlen ngei a beisei thu a sawi.

Governor hian Vairengte khaw chhunga Pradhan Mantri Ujjwala Yojana kaltlanga eirawngbawlna gas connection dawngtute leh Pradhan Mantri Awas Yojana hnuaia in sak ṭanpuina dawngte a tlawh a, heng hamṭhatna la dawng kim lote pawhin an dawn thuai a beisei thu a sawi ani.

Governor hian Serlui B Hydel Project tlawh nghal bawkin Lalbiaksanga, Chief Engineer, Distribution, P&E Department chuan kawlphetha siam chhuah hna kalpui dan tlangpui tarlanna hun a hmang a, Governor chu power siam chhuah theih zât te, tui tlêm avanga hun engemawchen power siam chhuak mumal thei lova a awm ṭhin thute lo hrilh a ni a, Governor chuan Mizorama hydel project siam hma-in tui awmdan zirchian hmasak ṭul a tih thu te sawiin, sum tam tak senga dinte chu phurrit a nih loh a ṭul tih a sawi a, Mizorama power siam chhuah a pun theih nana ṭul nia a hriat te a sawi a, ni zung chakna hmanga power siam chhuah dan tur chungchangte pawh an sawiho nghal a ni.

Serlui B Hydel Project a tlawhnaah hian Governor hian Tourisms leh Fisheries Department Official-te pawh an department hmalakna chungchangte a sawipui bawk a ni.

Governor hi John LT Sanga, Deputy Commissioner leh Vanlalfaka Ralte, SP, Kolasib-ten an ṭawiawm a ni.

Leave a Reply

This site uses Akismet to reduce spam. Learn how your comment data is processed.