Mara Autonomous District Council (MADC)-a MNF nena sorkar siam chungchanga insawifiah tura tih anga an insawifiahna chu Thawhlehni hian ngaihtuah a ni dawn.
MPCC President Lalsawta sawidanin MDCC hotute leh CongressMDC-te’n MPCC Political Affairs Committee (PAC) thutluk-na kalha MNF nena sawrkar an siam chungchanga insawifiah tura phûtna chu PAC chuan Thawhlehni khian a ngaihtuah dawn a, PAC thutlukna angin hrem an nih dan tur ruahman a ni ang.
MDCC hotute leh Congress MDC-te hian May ni 31 khan show cause notice chhânna hi MPCC-ah an thehlut tawh a – An insawi-fiahna-ah chuan NDA a thawkho sa BJP leh MNF-in sawrkarna inṭawm an siam theih tak lovah chuan an mite eptu lama an lo awm rei tawh avang leh rorellai lama ṭhut an duh ve tawh thute an tarlang a, inthlan ṭhat leh chu an tlin lova an hriat thute pawh an tarlang a ni.
MPCC thuneitu sang PAC hian MADC inthlan result a chhuah hnu khan an party chu eptu lama ṭhu turin Mara mipuiin an ti nia an hriat thu leh, mipui thutlukna chu an zah thu an sawi a. Mipui duhdan ang taka party dan nena thawkhova sawrkarna siam lova eptu lama ṭhu turin MDCC hruaitute leh an MDC thlantlinte chu an hrilh a, MDCC leh MDC 4-te thu-tlukna anga MNF nena sawr-kar siam an tum leh tak avangin insawifiah turin an ti ta a ni.