Maharastra politics chuan kum 2019-a ṭangrual sawrkar a din hnua buaina nasa ber an tawk mek.
Uddhav Thackeray kaihhruai ṭangrual sawrkar Maha Vikas Aghadi (MVA) aṭangin Shiv Sena hruaitu leh Cabinet Minister ni bawk Eknath Shinde leh a thurualpui MLA ṭhenkhatte an hel a, Shinde hian MLA 40-in an thlawp niin a sawi a, amah thlawptu MLA-te hi BJP sawrkarna Gujarat-ah a hruai thlak hnuah nimin zing khan BJP sawrkarna tho Assam-a Guwahati khawpuiah a rawn thlenpui a ni.
Shinde hian an tlinna party phatsana party danga pakai khapna anti-defection law pumpelh turin Shiv Sena MLA 55 aṭangin hmun thuma ṭhena hmun hnih tal a chhuahpui a ngai a, hetihlai hian Shiv Sena MLA zingah CM Thackeray thlawpute chu Mumbai-a hotel pakhatah khungkhawm mek an ni bawk.
Shinde hian Guwahati-ah hian MLA 37 a hruai thu leh midang 10-in an rawn zawm leh tur thu a sawi a, Shinde lamhnai tak MLA Pratap Sarnaik chuan Shiv Sena leh BJP sawrkar din a duh niin a sawi.
Nimin vek khan Maharastra sawrkar cabinet meeting pawimawh tak neih nghal a ni a, CM Udhav Thackeray chu COVID-19 hri vei mek a nih avangin internet kaltlanga a tel beisei a ni a, hei bakah hian Shiv Sena thawhpui NCP hotupa Sharad Pawar leh Congress hruaitu Kamal Nath-te chuan a hran ve vein inhmuhkhawm an ko bawk a, tun dinhmunah state politics kalzel dan tur hriat theih a la ni lo a ni.
Shiv Sena MLA hel-ten Guwahati an thlen hian Assam-a BJP MLA Sushanta Borgohain chuan airport-ah a lo hmuak a ni.