Zothlifim Logo
Loading ...

Mizoram hmasawnna tur kawng hrang hrang ngaihvena New Delhi-a kal Health Minister, Dr R. Lalthangliana chuan Mizoram sawrkarin New Delhi-a damlote enkawlna man bill theihna tur atana a thlan damdawi in ṭhenkhat tlawhin, damdawi in hotute leh doctor-te a kâwm.

Health Minister hian damdawi in 3 – Max Super Speciality Hospital, Fortis Escort Hospital leh Indra-prastha Apollo Hospital-te a tlawhnaah hian Health Minister chuan Mizoram aṭanga anmahni pantu damlote chu mi chi hrang hrang, dinhmun inang lo tak tak an nih ṭhin thu sawiin, ṭhenkhat chu ṭawng thiam lo leh sum leh pai lama harsatna neite an nih ṭhin avangin hriatthiamna thui tak nen lo dawngsawng ṭhin turin a ngen a, damlo nunna chân leh chhiat tawhna dang avanga nunna chânte ruang Mizorama thawn haw ngai a awmin post mortem leh damdawi in lamin an tihfel ngaite nghah chhung a rei ṭhin a, thlawhtheihnaa ruang thawn a nih dawn phei chuan hmanhmawh leh hnawhsarum taka thil tih a ngaih ṭhin avangin a buai-thlak a, Mizote chu mitthi an awmin inngaihsak leh inbuaipui nasa ṭhin hnam an nih bawk avangin damdawi in tualahte rei tak tak ruang nghah a ngai ṭhin a, hetiang thilah hian a awlsam zawnga thil tihfelsak zung zung ṭhin turin a ngen a ni.

Minister hian damdawi in hotute hnenah hian Mizoramah daktawr thiam super specialist kan la neih tlem thu sawiin, department pawimawh ṭhenkhatah phei chuan tumah kan nei lo a ni, a ti a. Damlo tam tak New Delhi pan thei lo an awm bakah Mizoram State Health Care Scheme-in a cover loh sum tam tak sên ngaihna a awm ṭhin a, a bik takin department pawimawh Mizo damlo tamna Cardiology, Cancer, Nephrology, Neurology, Endocrinology etc.-a an daktawr thiamte Aizawlah rawn tira free clinic rawn nei tura a ngenna chu damdawi in hotute hian ṭha an tih thu leh a tih theih dan tur an ngaih-tuah dawn thu an lo hrilh a ni.

Heng bakah hian Dr Thangtea chuan department pawimawhahte doctor kan neih mumal loh thu sawi nawn lehin, PG zir tur hian tlin a har bakah a zir chhung a rei bawk ṭhin avang leh tuna Mizorama kan natna tam ber kaihhnawih department an nih si avangin Mizorama doctor-ten heng natna chung-changa a pawimawh zual, Aizawl lama lo inenkawl ve theihna tur khawpa thiamna an neih theih nan an damdawi inahte training an pek theih chuan heng natnaa basic knowledge tal an nei ang a, Mizoramah pawh awmzia a nei thei ang ti a a ngenna pawh chu tih hlawhtlin ṭha an tih thu an sawi a ni.