Rural Development Minister Lalruatkima chuan nizan khan Mizoram Rural Livelihood Mission (MzSRLM) kaltlanga pek Phullen RD Block-a Village Organization 2 – Luangpawn leh Phullen VO hnuaia kuthnathawktute hman ṭangkai tur buh herna khawl leh hnim sam faina (grass cutter) a sem.
Lalruatkima chuan MzSRLM-in a tum ber chu a bik takin thingtlang hmeichhiaten lei rem an rah a, eizawnna ngelnghet an neih theihna tura ṭanpui a ni, a ti a. MzSRLM hnuaiah hian Self Help Group 8000 chuang awm mekin, Village Organization 640 chuang kan nei a, Cluster level federation 26 hnuaiah chhungkua 70000 chuang telin MzSRLM hmalakna kaltlang mi tam takin eizawnna mumal an nei thei ta hi a lawmawm a ni, a ti.
Phullen RD Block MzSRLM hnuaiah hian Khaw 31 awmin SHG 299 an awm a, chhungkaw 2245 an awm a ni.
Nimin khan Village Organization-te ṭanpui nan Self Help Group-te hnenah Custom Hiring Centre-a hman tur Combined rice mill 2 leh Oil Maker Machine 3 a sem a, heng khawlte hi Mizoram State Rural Livelihood Mission aṭanga athlawn a dawn a ni.
Nimin khan Zawlnuam BDO leh Kawrthah SDO (Civil) ni bawk, Ngulzathuama pawhin Zawlnuam RD Block huam chhunga Village Organization-te ṭanpui nan Self Help Group-te hnenah Custom Hiring Centre-a hman tur Combined Rice Mill 2 leh Oil Maker Machine 3 a sem bawk a, Combined Rice Mill 2 hi Saikhawthlir leh Suarhliapte hnenah hlan a ni a, Buh bakah Vaimin leh Aieng her nan pawh a hman theih a ni.
Saikhawthlir VO hnuaiah hian Self Help Group 10 an awm a, Suarhliap VO hnuaiah hian SHG 8 an awm a ni. Saikhawthlir Self Help Group te hian kum khat chhungin buh quintal 3000 – 4000 vel an tharchhuak thin niin an sawi a, Suarhliap Self Help Group te hian kum khat chhungin buh quintal 2000 vel an thar bawk.
Oil maker machine 3 te hi Saikhawthlir (Self Help Group–10), Chuhvel (SHG– 13) leh Bungthuam (SHG– 16) Village Organization te hnenah pakhat theuh pek an ni a. Chhawhchhi leh Antam mu aṭanga chawhmeh kanna Tel siamna tur a ni a, heng khawlte hman dan leh enkawl dan tur training hi company aṭanga tech-nical expert-te’n an pe nghal bawk.