Thai boxer laka chungnung taka an chak hnuah The Fighter world boxing show huaihawttu TL Promotions chuan an hnuaia Asian title chuh turin Vanlalawmpuia leh F.Zoramchhana an sawm.
Inrinni khan Spaceplus, Bangkok-ah India number one Awpa’n super lightweight huangah round 6 an inhnek chhungin Aekkawee Kaewmanee a awpbet hneh hle a, round tin la vekin unanimous decision-in a chak a, Khuangthing fighter hian nawr tluan zakin judge pathumin 60-54 vekin an chaktir vek a ni.
Bantamweight-ah Zotea’n WBA Asia Flyweight champion ni tawh Yutthana Kaensa lakah boxing hmuhnawm leh ṭha tak a lantir tluan a, judge pathumin round tin chaktirin 60-54 vekin unanimous decision-in hnehna a chang a, fiahna pawimawh tak a paltlang bawk a ni.
Mizo boxer pahnih hi ram pawna an inhnek hmasak ber leh Indian ni lo ram dang mi an tawn vawi khatna ve ve a ni a, round ruk an inhnek chhunga an inlan danin The Fighter show huaitu Thai promoter TL Promotions mit an tlung dun hle a, an dawr zui nghal a ni.
LPS Promotion hnuaia fehchhuak Mizo team coach Sete Lalchhuanawma chuan, “TL Promotions hian September-ah anmahni hnuaia Asia title chuh turin Awpa leh Zotea hi an sawm nghal a, a lawmawm tak zet a ni.
“Mahse, thu tawp siam nghal thei an nih loh avangin LPS Promotion, Marine Pro Boxing Promotions leh Sete Boxing Academy-ten sawiho phawt a ngai dawn tih hrilhin TL Promotions dawrna ka chhang,” tiin a sawi.
Awpa leh Zotea’n nuam ti takin hruihrual chhungah hun an hmang a, inbuatsaihna an neih ṭhat avang leh strength and condition coach Zuia Sailoin a enkawl dan avangin hah lovin an khel tluan thei a, round 10 thleng khel thei turin an taksa a inpeih tih an sawi.
Mizo team hian nimin khan Aizawl an rawn thleng a, Awpa leh Zotea hian senso tumsaka ram pawna fehchhuah theihna kawng hawnsaktu LPS Promotion leh Marine Promotions bakah Sete Boxing Academy coaching staff chungah lawmthu an sawi a, anmahni thlawptu Mizo mipui leh LPS pay-per-view leitute chungah an lawm hle a ni.