Zothlifim Logo
Loading ...

Mizorama Auto Rickshaw service zawng zawngte chu ‘fare meter’ vuah vek tura hriattir an ni a, hei hi sawrkar pawmpui rate anga mipuiten Auto Rickshaw an hman theihna tura State Transport Authority (STA) hmalakna a ni. Hetihlai hian transport department chhinchhiah danin, kumin March thlenga Mizorama Auto Rickshaw awm zat chu 7,565 a ni.

Hemi chungchangah hian July ni 7, 2022 khan STA chuan ‘order’ chhuahin, chuta tarlan a nih dan chuan, fare meter vuah tura order chhuah a nih atanga Auto Rickshaw thar lei reng rengte chu fare meter vuah nghal vek tura tih an ni a, vuah lo te chu registration phal sak tawh loh tur a ni.

Auto Riskshaw service lai, register fel tawhte chu order chhuah atanga thla 6 chhungin fare meter an vuah vek tur a ni a, hun tiam chhunga tifel hmanlo te chu fitness certificate pek loh tur a ni.

Standard of Weights & Measures, Govt. of India in a approve chauh fare meter hman tur a ni a, sawrkarin a approve rate dinglai (1st km – Rs. 30, subsequent km – Rs. 20) angin fare meter chu set tur a ni a, a dik leh dik loh MVI ten an check thin ang a, a dik thlap chuan khawih danglam theih lohin an seal thlap tur a ni.

Transport deaprtment chhinchhiah danin, kumin March thleng khan Mizoram-ah Auto Rickshaw/Three Wheeler (passenger) 7,565 a awm a, Aizawl district ah 1,238 awmin, Lunglei district ah 2,048, Siaha district ah 929, Champhai district ah 869, Kolasib district ah 1,261, Serchhip district ah 495, Lawngtlai district ah 689, leh Mamit district ah 36 a awm.