Health Minister Dr. R.Lalthangliana chuan a department hmachhawp thil hrang hrang bawhzuiin New Delhi-ah sawrkar laipui hotu hrang hrangte a dawr a, Minister hi Health & Family Welfare Board Vice-Chairman Dr ZR Thiamsanga, MLA leh Road & Infrastructure Development Board Vice-Chairman Er. H. Lalzirliana-ten an ṭawiawm a ni.
Dr R. Lalthangliana hian nimin chawhma dar 11 khan Ministry of Micro, Small & Medium Enterprises (MSMEs) Secretary BB Swain hmuin, Mizorama Industry hrang hrangte tihchangtlun a ṭulzia sawipuiin, Luangmual (Aizawl), Lunglei, Champhai leh hmun hrang hranga Industrial Growth Centre-te tihchangtlunna tura Project an thehluhte tihhlawhtlin ngei a nih theihnan theihtawp lo chhuah turin a ngen a, MSMEs Secretary hian chak taka bawhzui a tum thu a lo sawi a ni.
Hemi hnu hian Land Port Authority of India (LPAI) Chairman Aditya Mishra, IPS an hmu leh a, Mizorama Border Trade tihhmasawnna chungchang June thlaa a sawipui leh rawtna a thlen chungchangte a sawipui leh a, LPAI Chairman hian Dr Thangtea ngenna an bawhzui thu sawiin Kawrpuichhuah ICP tihchangtlunna tur DPR awm sa cheng vaibelchhe 170 chu ennawn (revised) a nih hnuah cheng vaibelchhe 552.25 a tihpun a nih thu a lo sawi a, he DPR hi kar hnih kalta khan Ministry of Home Affairs-ah an thehluh tawh thu leh a hlawhtlin ngei beiseina an neih san thu a lo sawi a, Zokhawthar LCS leh Zorinpui LCS tihchangtlunna tur DPR an siam mek thu Minister hi a hrilh bawk a, Minister hian Ministry of Home Affairs-a Additional Secretary Piyush Goyal, IAS hmu chhunzawm nghalin LPAI-in DPR an thehluhte chak zawk leh awmze nei zawka lo bawhzui saka hma lo lakpui turin a ngen a, theihtawp chhuah a tum thu MHA Additional Secretary hian a lo sawi a ni.
Nimin chawhnu khan Union Minister of Health and Family Welfare Dr Mansukh Mandaviya chu a pisa-ah Dr Thangtea te hian an kawm bawk a, he hunah hian ZMC Registrar Dr Jane Ralte-in Minister hi a ṭawiawm a, Zoram Medical College tihchangtlunna tur Concept Paper an buatsaih chi hrang hrang Union Minister hnenah hian thehlutin, Mizoram sawrkara Health & Family Welfare Department hmalakna kawng hrang hrangte an sawipui bawk a ni.