Health Minister Dr R. Lalthangliana chuan Inrinni khan Guwahati-a Dr.B.Barooah Cancer Institute (BBCI) leh Guwahati Neurological Research Centre (GNRC)-te a tlawh a, heng damdawiin pahnihte hian Mizoram doctor te tan training buatsaih an inhuam thu an lo hrilh.
Minister hian BBCI tlawh hmasain an Director Dr AC Katatki, Heads of Department-te leh faculty member-te nen inkawmhona hun tawite an nei a, Dr. R.Lalthangliana chuan BBCI hotute chu Mizoram tana an ṭangkai thu hrilhin, Mizoram aṭanga Cancer vei damlote an lo enkawl ṭhinnaah lawmthu a hrilh a. Mizoramah Cancer natna a hluar avangin Mizoram Doctor-te tan short term training buatsaihsak tur leh Mizoramin Cancer Superspeciality Hospital a neih theihna turah an ṭangkai theihna zawnpui turin a ngen hlawm a ni.
BBCI hotute chuan Mizo Doctor tam thei ang ber ‘Cancer Care and Management’ a training pek an inhuam thu sawiin, October thla velah ‘One-day Seminar on Cancer Care & Management for North-East States’ chu Mizoram sawrkar nen ṭangduna buatsaih an inhuam thu Minister hi an hrilh nghal a ni. He inkawmhona denchhen hian Dr R. Lalthangliana chuan BBCI bi-yearly Journal a tlangzarhsak nghal bawk a ni.
Minister hian GNRC Hospital tlawh lehnghalin, an Managing Director, Dr.Nomal Chandra Borah leh Senior Doctor-ten Minister hi an lo hmuak a inkawmhona hun ṭha tak an nei a ni. He hunah hian Dr R.Lalthangliana chuan Mizoramin Neurology-a mithiam kan tlakchham thu leh GNRC-a mithiamte puihna Mizoramin a mamawh thu a sawi a. GNRC hotute chuan Minister ngenna angin Mizoram Doctor-te short term training a thlawna pek an inhuam thu hrilhin, Mizoram sawrkar nena ṭangdunin an Neurosurgeon-te a tam thei ang ber Mizorama damlo en tura an tirh tur thu an sawi a, an Hospital pantu Mizo mipui ṭanpui ngaite tan liau liau ṭawng lettu an rawih tur thu Minister hi an hrilh bawk a ni.
Dr R. Lalthangliana hian heng Hospital pahnihte a tlawh hnu hian Mizoram House, Guwahati-ah Young Mens Christian Association (YMCA), North-East Region Executive Committee meeting a kaihruai nghal a, YMCA-in chak zawka hma an lak dan tur ngaihtuahin, YMCA la din lohna hmuna din thar zel a nih theih nan Task Force a din nghal a ni.