Nimin khan ZPM Leader Lalduhoma chuan thuchhuah siamin, National Health Mission hnuaia Mizoram sawrkara hnathawk nuak mekte harsatna chu a rang thei ang bera sukiang tura sawrkar an phut thu a sawi.
Lalduhoma chuan thuchhuah a siamah chuan NHM hnuaia hna-thawk chu mi 2000 chuang an awm mek tih sawiin, heng mite hi zawi zawia state sawrkar kuta awm tur an ni, tiin, India rama state zawng zawng tih theih deuhthaw hian an regularise tawh tih a sawi a, sawrkarin study team-te siamin report-te an thehlut a, mahse, eng nge an zir chhuah a, eng nge an recommend tih pawh thup tlat a ni a, tunah hian loh theih loh avangin an nuar ta a ni, a ti.
Health department hnuaia NHM-ah hian thawktu hi 60% vel an awm a, tunah hian 60% chu an chawl ta vek a ni. Heng ho tel lo hian damlo enkawlna a kal mumal thei lova. He thil hi thleng lo tur hian sawrkar hian a tih dan a ngaihtuah a ngai tih a sawi a, chutih lai mek chuan sawrkar hian vau zuiin banah te a vau zui hi hriatthiam har an tih thu a sawi a, “Heng kan unau nuar mekte hi kan lainat a, an harsatna te a rang thei ang ber a sukiang tûrin sawrkar kan phut a ni,” a ti.