CM-in sawrkar hnathawkte chên khawmna tur ‘Federation Encalve’ project a tlangzarh
Chief Minister Zoramthanga chuan nimin khan Mizoram a housing complex hmasa ber tur, sawrkar hnathawkte puala housing complex din tur, ‘Federation Enclave’ project chu Govt. Complex, Luangmualah a tlangzarh a, Flat/Apartment man aṭanga 10%-in booking a tih theih nghal a ni.
He project hi Mizoram sawrkar hnuaia hnathawk intelkhawm Federation of Mizoram Government Employees & Workers (FMGE&W)-ten Mizoram sawrkar hnathawkte puala housing complex an din tur a ni a, Flat/Apartment 300 chuang awm thei tura ruahman a ni.
Chief Minister chuan sawrkar hnathawkten theih-tawpa bul an ṭan, ‘Federation Enclave’ chu a hlawh-tlin ngei a duhsak thu sawiin, he hmalakna hi mi tam takin an ṭangkaipui hle tur thu a sawi a, mamawhna avanga piang hmalakna chu a hmang ṭangkaitu turte mamawhna phuhru ngei tura buatsaih a pawimawh thu sawiin, ngaihtuahna leh hmathlir ṭha tak hman a pawimawh thu a sawi a. Hmun dangah, district dangah pawh hetiang ang housing complex siam duh an la awm zel theih thu sawiin, hmasawnna ruhrel ṭha din tur chuan plan ṭha tak neih a pawimawh thu a sawi a, eng hmalakna pawh ni se, vision neih ṭhat a, kan tuma kan chian chuan engtikah emaw a hlawhtlin tur thu te, a tlachawp chin chiah ngaihtuah ṭhin nih a hlauhawm thu a sawi.
Khualzahawm Er. K. Lalsawmvela, Adviser to CM (Technical) pawhin thu sawiin, sawrkar hnathawk chu an service chhungin hmun hrang hranga post kual an nih ṭhin avangin tam tak tan in hmun nghet tur ngaihtuah a remchang lo ṭhin a, heng housing complex hian rem-channa sawrkar hnathawk-te tan a thlen dan tur sawiin, a tam thei ang berin an ngaihven a booking an tih thuai a duhsak thu a sawi.
Er. R. Lalrammawia, Chairman, Mizoram Govt. Employees Housing Society chuan kalkhawm-te lawmna thu sawiin, Lalchuailova, FMGE&W President, Prof. Christopher Charles Benninger, Principal Architect and Town Planner, Er. Partha Phukan, Chairman and MD, Blue Mountain Corporation ten thu sawi bawkin, J.Ramdinmawia, Secretary General chuan lawmthu sawiin hun a khar a ni.
Federation Enclave booking ti turte tana dilna, application form lakchhuahna tur hi Aizawl bakah District ṭhenkhatah collection centre siam a ni a, Application Form-te hi Rs.2,000/- zela lei tur a ni a, hei hi lakkir theih tawh loh (Non-Refundable) a ni a, Flat/Apartment man aṭanga 10% pe-in Booking tih theih a ni a, Allotment an hmu lo a nih chuan hei hi lakkir (Refund) leh theih a ni thung a, a bak 90% zawng chu Bank hrang hrang SBI, MRB leh MC Apex Bank aṭangte-a Home Loan an lak hmangin pêk theih a ni dawn a, Bank Loan te hi Project Site-a Construction Work Progress azir zelin Instalment-in Bank-in an pe chhuak ang a, Booking tih laia Full Payment ti nghal duh an awm a nih chuan Flat/Apartment man (Price) aṭanga 10% Discount pek an ni dawn a ni.
==============
CSC-VLE kaltlanga mipuiten HDFC bank aṭanga hamṭhatna an hmuh theih dan inzirtir
Nimin khan Serchhip District chhunga Common Service Centre -Village Level Entreprenuer (CSC-VLE)-te kaltlanga mipuiten HDFC Bank hnuaia ham-ṭhatna hrang hrang leh Bank loan hrang hrang an lak theih dan tur inzirtirna neih a ni.
Nimina HDFC Office, AOC Veng, Serchhipa CSC -VLE-te hnena anmahni kaltlanga mipuiten hamṭhat-na an hmuh theih dan tur kawng inhrilhhriatnaah hian Master Trainer Lalruatliana, State Financial Institution (FI) ICTC, Vanlalmuanpuia Parte, Area Head, CSC-HDFC leh Raymond Lalengkima, Sr. Executive HDFC-ten zirtirna hrang hrang pe-in,zawhna leh chhanna hun an hmangho bawk.
Serchip District chhung-ah khua leh veng hrang hrangah tun dinhmunah CSC-VLE 71 awm mekin, training zawh hian CSC-VLE-te chu HDFC Bank-ah 0 (Zero) Balance-in Bank Account thar hawnsak nghal an ni bawk.
HDFC Serchhip Branch thar hi kumin April ni 1 khan Serchhip AOC Vengah hawn ṭan a ni.
=============
SEDP pilot project-ah chhungkaw 32,756-te bulṭanna pek an ni tawh
Mizoram Planning Board Vice Chairman H.Rammawi chuan “SEDP hnuaiah pilot project-ah chhungkaw 32,756 hnenah bulṭanna pek tawh a ni,” a ti a, “Kumin chhungin, chhungkaw 60,000 chuangah, Rs.50,000/- zela pek hman tuma hmalak mek a ni,” a ti bawk.
Adviser, MNF Gen. Hqrs. ni bawk H.Rammawi chuan he thu hi nimina Aizawla Mizo Hnam Run chhung inkhawm neihah sawiin, MNF party hi vision nei ṭha a ni a, kum 2020 aṭangin Aizawl khawpui chhungah ropeway siam tura hmalak a ni a, company-te nena inremna siam vek tawh niin, ground survey neih mek a ni, a ti a. Budget-a sum hmuh tarlang kim duhloa MNF sawrkar puhtu party-te hian budget kalphung an hriat loh vang a ni a, leiba chungchanga MNF sawrkar puhtute hi sawrkar ve ta se, leibatna tur zawnga virbuai nasa ber tur an ni ang, a ti bawk.
H. Rammawi chuan Mizoram hruaitu hmasaten theihtawp chhuahin ram hruai ṭhatna leh ram humhimna an lo thawk ṭhin a. Hruaitu hmasate hmalakna liantham chhun-zawm duhlo an awm ṭhin. MNF erawh chuan Laldenga CM-na hnuaiah hruaitu hmasate hmalakna Bairabi hydel project-pawh chhun-zawmin, techno-economic clearance pawh a hmu hman hial a, a hnuah Congress sawrkarin a chhun-zawm duhlo a, Laldenga hmalaknain Airport siamna tur pawh bulṭan a ni a, MNF sawrkarin KMTTP chung-chang pawh khatihlaia CM Zoramthanga hmalaknaa bulṭan a ni a, MINECO leh hmun hrang hranga hmasawnna pawh kalpui zel a ni a ti bawk.
=================
NEUM-ten an rawtna sawrkarin a pawmpui theih chuan nawrh an huaihawt mek tihtawp an remti
National Health Mission Employees Union Mizoram (NEUM)-ten sawrkara an thil phût nawr nan tiamchin awm lova an hna an chawlhsan mek chu sawrkarin an rawtna an pawmpui thei a nih chuan tihtawp ni se an ti.
NEUM-ten sawrkara an thil phut pathum zingah hian sawrkarin an hlawhte chu a hun taka pe turin an duh tih an sawi a, NEUM hamṭhatna tur zirchiang tura Study Group kal lai mek chu kumin September thla ral hmaa peihfel ni se an duh tih sawiin, NHM hnuaia Contractual Staff-te chu MEMSA Order puan khum tawhlo turin an duh tih an sawi bawk.
NEUM-te hian Mass Casual Leave ni 3 an lâk bakah lungawi lohna ni 2 chhung an lantir chhun-zawm hnuin niminpiah khan sawrkarin hna an zawm leh zawm loh endiktu controlling officer-ten an endik tur thu leh hna an zawm lo zel a nih chuan dân angin sawrkar chuan hma a la mai dawn tih an sawi a, amaherawhchu nimina Controlling Officer-ten an endiknaah hna zawm an la awm lo a ni.
Tarlan tawh angin, NEUM-ten sawrkara an thil ngiat nawr nan tiamchin awm lova an hna an chawlhsan chungchangah sawrkarin dan angin hma a la dawn a, khawng taka kal an tum tih Health Department Principal Secretary Esther Lalruatkimi chuan a sawi a ni.
==================
MPCC PAC dinna a la ngai
Mizoram Pradesh Congress Committee (MPCC) president Lalsawta chuan Mara Autonomous District Council (MADC) sawrkar din kaihhnawih chung-changa PAC thutlukna puangin, PAC dinna chu a la ngai reng tih a sawi.
Lalsawta chuan PAC thutlukna puangin, “July 12, 2022-a PAC meeting chuan Displinary Action Committee-in a zirchianna leh ṭul ang ang a rawn theh luh chu kan sawiho a. MADC-a Congress MDC 4-ten Congress led government siama MNF an thawhpui hi PAC-in a remtih loh a nih avangin PAC hi hemi chungchanga kan dinna hi a la ngai reng a ni,” a ti a, “Duh se chu MNF leh BJP hian MDC 21 neiin sawrkarna an siam thei reng a. Amaherawhchu, 2023 General Election thlir rânin an thawkho duh lo a, Mara mipui dinhmun ngaihtuah miah lovin sawrkarna an siam duh lo a ni. Keini pawhin nakum inthlan thlirin BJP hi thawhpui chiah kan ngai lo hrim hrim a. Tin, MNF pawh hi tuna an hnuhma leh an sawrkar ṭhat loh em avang hian thawhpui chiah kan ngai hek lo. Kan thawhpui chuan MLA Election campaign hunah sawi tur kan neih pawh kan ring lo,” a ti a, “Chuvang chuan thawhpui loh nise tih hi PAC hian vawi 3 a rel a, a vawi 4-na atan kan dinna hi kan puang nawn leh a ni,” a ti.
===============
Winery hi zu siamna factory ni lovin, food processing unit zinga mi a ni:Lalduhoma
ZPM Leader, Lalduhoma, MLA chuan nimin khan Champhaia Grape Winery tlawhin, Champhai Grape Growers Society hruaitute nen inkawmhona hun an hmang a, hetah hian Lalduhoma chuan, “Food Safety and Standard Authority of India-in grape wine hi food item-ah a puang a ni. Winery pawh hi food processing unit-a ngaih a ni a, he in winery pawh hi zu siamna factory a ni lo va, food proceesing unit zinga mi a ni,” a ti.
Lalduhoma chuan, “Kan ram chhunga thar ngei grape kan ram chhûngah a sawngbawlna mumal tak kan nei hi kan lawm hle a. Chutih laia harsatna in tawk mai hi pawi kan tiin hriatthiam har kan ti a, Horticulture department hi nodal department atan hmangin nodal officer te neiin chhawmdawlna awm thei ang ang te pawh an buaipui che u a, sawrkar hriatpuiin hma nasa takin in laa sawrkar pawhin a hriatpui che u a ni,” a ti.
Lalduhoma chuan, “Tun hnaiah grape wine zuartu Lalhriatpuii chu nuai 20 chuang man lai a grape wine zawrh man sak a ni a, chumi avang chuan rilru leh taksaah harsatna te tawkin a nunna hial a lo chân hi a pawi kan ti tak meuh meuh a, social media-ah te a ralna tur veh bur te khawnin buatsaih sak a ni a, heng hi keini chuan kan support a, kan neih ang ang te i thawh ang u tiin kan in chah duh a ni,” a ti bawk.
=================
Agriculture Minister-in Oil Palm scheme har scheme ṭha tak ti
Agriculture Minister C.Lalrinsanga chuan Mizorama Oil Palm hmalakna chungchang te pawh sawi langin loneitute tan Oil Palm scheme thar chu scheme ṭha tak a nih thu a sawi bawk.
C.Lalrinsanga hi Bangalore-a neih mek National Conference of State Agriculture and Horticulture Ministers-ah nimin leh niminpiah khan a tel a, he hunah hian C.Lalrinsanga chuan thu sawiin, Mizoram-in Agriculture lama hma-sawnna kan neihte report-in, loneitute harsatna leh Mizoramin Agriculture lama a mamawh hrang hrangte a thlen a, chung zingah chuan Central Scheme pangngaiin a tuam ngai loh Agriculture Link road te, Hill Terracing te, Central Scheme hrang hranga cost norm-te chu Hmarchhak state-te tan a hniam lutuk ṭhin avanga tihsan a ngaih chungchangte pawh Agriculture Minister chuan a thlen a. Mizorama District thar pathumah KVK din belh turin Central Sawrkar chu a ngen bawk a ni.
Kum 2021-a National Good Governance Index-a Mizoram chu Hilly States Category-a Agriculture and Allied Sector-a tiṭha ber (Pakhatna) kan nih angin Mizoramah hian Agriculture lama potential kan ngahzia leh Central sawrkar tan pawh duhsak bik kan ṭulzia Minister chuan a sawi a, Central sawrkar hotute pawhin a thu thlente chu an lo enzui nghal tur thuin an chhang a ni.
He intawhkhawmna hi ram pum huapa Agriculture leh Horticulture Minister-te intawhkhawm vawi khatna niin Union Agriculture Minister Narendra Singh Tomar chuan khuallian niin a hmanpui a, he Conference-ah hian Agriculture leh Horticulture-a India ramin hmasawnna bung thar chuan kai a tum dan kawng hrang hrang chhawp chhuaha sawiho niin, ram pum huapa Agriculture mithiamten presentation hrang hrang pein State Minister-te pawhin mahni state dinhmun report-in harsatnate an thlen bawk.
Minister hian Bangalore a cham chhungin Bangalore Mizo Association-te pawh thil pawimawh tak tak a sawipui a, a ṭul apianga an lo hman atan Rs.30,000/- a pe bawk.
============
Hri kai 119 hmuh belh
Niminpiah, July ni 14, 2022-a Mizoram hmun hrang hranga Covid-19 sample test hrang hrang neih aṭangin COVID-19 positive thar 119 hmuhchhuah a ni a, Covid-19 hmuhchhuahna District-te hi Aizawl (61), Lunglei (38), Saitual (14) Champhai (4) leh Hnahthial (2)-te an ni a, District dangah hian Covid-19 sample test kalpui ni mahse report siamtuten NEUM nawrhna an zawm avangin report a awm lo a ni. Heti hian Mizorama Covid-19 hri kai hmuh chhuah tawh zawng zawng chu 2,30,348 a ni a, tun dinhmunah hri kai enkawl mek 1067 awmin, thihpui hi 706 an awm tawh a ni.
=================
Press Club sakna tur pe
Serlui bialtu MLA Lalrinsanga Ralte chuan nimin khan a bial chhunga mi mamawhte hnenah
wheelchair 4 leh bengdar 5 chu a office-ah a hlan a, hemi rual hian Kolasib District MJA te hnenah Press Club sak chhunzawmna turin MLA Fund Rs.2,00,000/- a hlan bawk. MLA chuan fund chu langtlang taka hman a duhthu leh bial chhung chhungkaw tin thlengzo ni se a duh thu a sawi.
================
Damdawi in sakna tur tender chhuah
Mizoram sawrkar chuan Kolasib District Hospital khum 100 awmna sak ṭanna turah tender a chhuah a, tender-ah hian Hospital sakna tura sum ruahman chu cheng vbc. 19.41 niin, thla 24 chhunga sak zawh tur a ni. Bialtu MLA K Lalrinliana, MoS chuan Kolasib MJA-te hnenah a sak hna hi party worker te kutah pek a ni dawn lo tih a lo sawi tawh a ni.
================
Covid-19 hri danna precaution dose pek runpui Mizoramah pawh kalpui ve dawn
Sawrkar laipuiin India ram zalenna kum 75 tlin puala nimin aṭanga kum 18 – 59 inkarte a thlawna Precaution dose pek runpui – ‘Covid Vaccination Amrit Mahotsava’ kalpui tur a puan chu Mizoramah chuan kalpui a la ni ve rih lova, amaherawh-chu Health Minister Dr R.Lalthangliana chuan Mizoram ah kalpui ve a nih tur thu nimin khan a sawi.
He vaccine pek runpui hi nimin aṭanga chhiar a ni 75 chhung September ni 30 thleng a huam dawn a, Health Minister Dr. R. Lalthangliana hova District tina Deputy Commissioner te, Chief Medical Officer (CMO) te leh District Information & Public Relations Officer (DIPRO) ten an bial chhung theuha COVID-19 dinhmun sawihovin virtual meeting nimina an neihah Health Minister chuan Mizoram chhungah pawh kalpui ve a nih tur thu a sawi a, an kalpui hun tur chiah erawh hriat a la ni lo a ni.
Precaution dose hi 2nd dose la tawhte tan 2nd dose an lak aṭanga thla 6 a liam hnuah lak theih tih sawiin, kum 18 tling tawh precaution dose la thei zawng zawngte la vek turin a ngên a, kum 12 chung lam vaccine la la lote pawhin la vek turin a ngen bawk a, hemi tur hian district tina DC te, CMO te, District Immunization officer- te hma lo la vek turin a ngen bawk a ni.
He meetingah hian District tinah Dedicated COVID Health Centre (DCHC) tinung thar leh turin chah an ni a, Damdawi ina damlo enkawl laite hri kai an awm chuan enkawl chhunzawm tur leh anmahni dahna tur ward/wing hran siam turin an inchah bawk a ni.
==============
Football thuthang (16.7.2022)
@ Real Madrid chuan Borussia Dortmund midfielder kum 19 mi, Jude Bellingham lakluh dan tur zawn an tum a, Bellingham hi Liverpool nen pawh sawi zawm an ni. (Marca)
@ Frenkie de Jong agent chuan Manchester United hnenah Netherlands midfielder kum 25 mi hian Barcelona chhuahsan tura a inhawn thu a hrilh a, mahse Old Trafford lama insawn chu a duh lo tih a sawi. (Sport)
@ Barca hian De Jong hian Red Devils lam pan a duh theih nan US-a tour an neih turah pawh squad-a telh loh an tum. (Sport)
@ Manchester United forward Cristiano Ronaldo chuan Saudi Arabia club-in contract tam tham tak an zawrh chu hnar a tum a, Bayern Munich leh Atletico Madrid-te pawhin Portugal forward kum 37 mi hi an ngaihven a ni. (ESPN)
@ Juventus chuan Bayern Munich lam pan tura beisei Netherlands defender Matthijs de Ligt, 22 thlaktu turin Arsenal chu Brazilian defender Gabriel Megalhaes, 24, chung-changah an dawr. (Independent)
@ Bayern Munich’s Germany winger Leroy Sane, 26, chu Real Madrid lam pan turin thlem a ni. (Marca)
@ Paris St-Germain chuan Benfica forward Goncalo Ramos, 21, leh Reims striker Hugo Ekitike, 20, te chu an ngaihven. (Fabrizio Romano)
@ PSG hian France legend Lilian Thuram fapa, French midfielder kum 21 mi, Khepren Thuram pawh Nice aṭanga lak chhuah an duh. (L’Equipe)
@ Spain midfielder Cesc Fabregas, 35, chuan Monaco a chhuahsan hnuah Italian Serie B club, Como tan contract ziak a tum. (Gianluca di Marzio)
=================
FPO kaltlangin Farmer-te tan kawl a eng dawn:BJP president
BJP Mizoram President Vanlalhmuaka chuan nimina an party office-a political session neihah “Mizoramah hian Farmer-te tan Central sawrkar chuan kawng nasa takin a hawng a, (Farmer Producers Organisation (FPO) kaltlangin India ram hmun hrang hrangah hmalak niin, hlawhtling takin kalpui mek a ni a, keini Mizoramah pawh hian he FPO kaltlang hian Mizoram hmun hran hranah member 500 thlai chinna tur atana ram nei intelkhawmte chuan a tih theih a ni. Nimahsela tunah hian Mizoramah erawh FPO kaltlanga hmalakna hi a zuih ral leh a, keini BJP hian sawrkarna kan chang a nih chuan FPO kaltlang ringawt pawh hian nasa takin Farmer-te’n hma kan sawn nasa hle dawn a, Mizorama Farmer-te tan kawl a eng dawn a ni”, a ti.
Vanlalhmuaka chuan, “FPO System-ah chuan State sawrkarah sum a lut lo a, Direct-in Kuthnathawktu, Farmer-te hnenah a luh avangin BJP sawrkar lohna state-ah chuan an kalpui ṭha duh lo tlangpui a, chuvangin Mizorama Farmer-te hian tuna kan thlai thar tam tak eng chiah pawh harsatna kan neih ang hi he FPO kaltlang hi chuan sutkian a nih dawn avangin Farmer-te tan kawl a eng dawn a ni. Thlaithar leina tur Budget-a dah pawh ngai lovin Direct-in kan thawhrah hi kan seng thei tawh dawn a ni,” a ti a, “Chuvangin Mizorama Cheng ka unau, ka retheih pui te u, kan tan kawl a en theihna turin Kum 2023 MLA General Election lo awm turah hian, kan Politician-te tan chauha chakai khawrhsak tawh lovin leh mipuite’n kan tana chakai kan khawrh ve theih tawhna turin, kan fairel Bel thleng phak kan ngaihtuah a hun a, keimahni tan kan hmasawnna tur kan thlan thiam a hun tawh a ni,” a ti bawk.
He hunah hian Lalrintluanga, Aizawl District Vice President, State Kisan Morcha hminga Arunachal-a zin chuan Kisan Morcha Meeting report a pe a, Dr. BD Chakma MLA, State Vice President in President inthlan lo awm tur atana Central-a training an neih chungchanga a zinna report a pe bawk.