Skip to content
Home » Chanchinthar » District thuneituten tha zawka mipui rawng an bawl theih nan DC tinte thlatin meeting neihpui tum

District thuneituten tha zawka mipui rawng an bawl theih nan DC tinte thlatin meeting neihpui tum

Principal Secretary, General Administration Department Navin Kumar Choudhury chuan nimin khan District 11-a Deputy Commissioner leh an aiawhte chu video conferencing hmangin meeting pawimawh tak a neihpui a, District Administration-te hnathawh dan leh tun aia ṭha zawka mipui rawngbawl hna an kalpui theih dan kawng hrang hrangte a sawipui a, ruahmanna engemaw zat ṭha nia a hriat a tarlante chu a taka kalpui turin DC tinte a chah a, hetiang meeting hi thlatin Ningani tawp berah neih a nih tawh tur thu a sawi bawk.

Meeting-ah hian DC-te hnathawhte bakah an harsatnate sawiho ṭhin a ni dawn a, chu mai bakah Secretary hrang hrangte pawh heng meeting-ah hian telin an Department chan ṭheuh hnuaia District hrang hranga hmalakna an neih mek leh ruahmanna an siamte DC-te an sawipui ṭhin ang a, DC-ten henga harsatna an neih leh tawhte chu a Department changtu Secretary-ah an thlen thei dawn tih GAD Principal Secretary chuan a sawi a, a bulṭan nan nimin meeting-ah hian Commissioner and Secretary, Health & Family Welfare, Esther Lalruatkimi leh Secretary, School Education Department Dr. Lalzirmawia Chhangte-te an tel a ni.

Meeting-ah hian GAD Principal Secretary chuan mipuite hnena inrelbawlna ṭha zawk a thlen theih nana DC-te mawhphurhna leh hemi atana ṭul leh pawimawh nia a hriatte chu a sawi lang a, chu’ng zingah chuan mipuite vuivaina aw leh an harsatna tawhte thuneitute hnena a thlen vat theih nan District-a grievance redressal mechanism siam te, District mipuite mamawh chiang zawka DC-ten an hriat theih nan District huam chhunga khuaahte zan riaka khua tlawh te, an hnuaia District Officer hrang hrangte hnathawh vil te, emergency services leh ṭul pawimawh dangte engtik lai pawha a ṭhat theih nana vilte an ni. District-ah hmasawnna hna hrang hrang thawh mekte chu enzui leh an thlen chinte a khât tawka enpui te, District tinin an District theihna (potential)-te hria a, chu chu engtinnge mipui tam zawkin an hlâwkpui theih ang tih kawng dapte chu ngaipawimawh turin a chah tel bawk a ni.

Meeting ah hian Health & Family Welfare leh School Education Secretary-te chuan an Department chan hnuaia an ngaih pawimawh zual bikte an DC-te an hrilh a ni.

Leave a Reply

This site uses Akismet to reduce spam. Learn how your comment data is processed.