Zothlifim Logo
Loading ...

Hri kai hmuh thar 5
Nimin khan Serchhip District-ah Covid-19 hri kai hmuh belh mi 5 an awm a, nimina hmuh belhte hi Khawlailungah 4 leh Thenzawlah 1 an ni a, hetihlai hian nimin khan hri kai enkawl dam an awm lova, heti hian Serchhip District-a hri kai hmuhchhuah tawh zawng zawng chu mi 14,489 an tling tawh a, hri kai enkawl dam zawng zawng hi mi 14,428 awm tawhin, enkawl lai mi 26 an awm mek a, thihpui hi mi 35 an awm tawh a ni.

Chess-ah champion
Mizoram Chess Open Championship, 11th David Memorial Championship 2022 nizan hmasaa Aizawl Ramhlun Indoor Stadium-a neih zawh takah Serchhip District Chess Association president ni lai, Vanlalzarliana chu kum 60 chung lam inelna, Veteran Category-ah a champion a, Open Category-ah Lallianmanga, Champhai District a champion a, he Chess championship hi Mizoram Chess Association buatsaiha lawmman pawisafai tamna ber niin, lawmmanah hian ₹1,59,800/- semral a ni.

I&PR Minister-in Photo Art Exhibition hawng
World Photography Day kum 183-na pualin nimin khan Mizoram School of Photography leh Photography Club of Mizoram chuan Aizawla Millenium Centre Atrium-ah Photo Art Exhibition vawi 6-na an buatsaih a, he exhibition hi I&PR Minister Lalruatkima’n a hawng a ni. Photo Exhi-bition hi a duh apiang tan tel theih a ni a, mi 39 telin, thlalak 130 a lut a, thlalak lutte hi Monochrome leh colour ah ṭhenin inelna neih nghal a ni a, thlalakte hi a duh tan lei theih nghal a ni bawk.