Zothlifim Logo
Loading ...

Attorney General, Supreme Court thupek angin September 1, 2022 aṭang hian Mizoramah ‘lirthei khalhtu dan bawhchhia hremna dan thar’ hman a ni dawn a. Dan tharah hian hremna a na/sang hle a, chutihrual Traffic Police Superintendent of Police, Sr. SP Rodingliana Chawngthu chuan a nih anga anga hman a nih loh tur thu leh ngaih-hnathiamna a awm tur thu a sawi.

Dan thar an siamah hian mi 2 aia tam inphurh chu ₹1,000/- chawi theihna a nih bakah an license thla 3 chhung atan tihtawp theih a ni a, dan hlui angah chuan hetiangah hian ₹100/- chawitir ṭhin a ni. Hemi chungchangah hian naupang 2/3 phura School hruai ṭhin chungchang zawhna chhangin, Sr. SP Rodingliana Chawngthu chuan, “Minors-ah chuan chutianga khauh vak theih a ni lo. Officer dangte nen pawh dan thar chungchang hi kan sawiho tawh a, na taka kalpui kan tum hran lo,” tiin a sawi.

Dan tharah hian Dan hlui a awm lo, hman thar tur pawh a awm nual dawn a, hemi chungchangah hian Traffic SP chuan, “A dan hi a khauh piah lamah a rawng a, a nihna angin kan hmang lo ang, pawisa pawh a hniam lam zela chawitir an ni ang,” a ti.

Transport department Director Er. R. Lalrammawia sawi danin, dan thar hi Attorney General, Supremce Court of India chuan ‘Motor Vehicle Ammendment Act 2019’ siamin, hei hi parliament-ah pawm a ni. Supreme Court dan siam chu state sawrkarin a tidanglam thiang lo a, sawrkar laipuiin ti tura a tih state-in a ti lo a nih chuan Article 356 of the Constitution of India (Presidents Rule’s-a dah) chu state sawrkar chungah lekkawh theih a ni.

Transport director chuan kum 2019-a dan siam ni tawh mahse, Supreme Court thuchhuak a nih vangin hman ngei a ngai tih sawiin, hemi vang hian September 1, 2022 aṭanga hman turin an ‘notify’ (puang) tih a sawi.

September ni 1, 2022 aṭanga dan thar hman tur chu dan zawm tan hlauh tur a awm lo tih Transport director chuan sawi bawkin, kumtlinglo a lirthei khalhtir te, license nung lo/nei loa lirthei khalhte, helmet khum loa lirthei khalhte leh dan hrang hrang zawm lote hremna erawh a nat/san dawn thu a sawi bawk.