Mizoram Police chuan nimin khan Mizoram Home Guards & Civil Defence hnenah silai leh a mu ṭhahnem tak an hlan a, silai hlan zat hi Self-Loading Rifle (SLR) 200 leh Indian Small Arms System (INSAS) 100, avaiin 300 a ni a, silai pakhat hian magazine 4 magazine pakhatah hian silaimu 20 zel awm) a chhawm tel ṭheuh a ni.
Silai leh a mu hlanna inkhawm hi Home Minister Lalchamliana chuan a hmanpui a, a hriatpuinain inhlanna certificate ziah a ni a, Mizoram Police aiawhin IGP (Hqrs) John Neihlaia’n hming a ziak a, MRHG & CD aiawhin Mizoram Home Guard Commandant General Maj. Zosangliana Hualngo-in hming a ziak bawk a ni.
Home Minister chuan Mizoram Police-in MRHG & CD hnena silai an hman lai reng, la ṭha tak tak an pe chu thil lawmawm tak leh chhinchhiahtlak tak a ni, a ti a, hun engemawchen aṭang tawh khan MRHG & CD hnena silai hlan hi a ṭul tihna a awm tawh a, amaherawhchu sawrkar kalphung dan leh hrai zawm a ngaih ṭhin avangin beisei aiin hun a duh rei a ni, a ti a, an hman lai aia ṭha zawk silai an neih chuan MRHG&CD te pawhin inrintawkna, phurna leh thathona a pek ngei a beisei thu a sawi bawk a ni.
Home Minister chuan Mizoram Police pawhin silai leh ralthuam a ṭha thei ang ber nei se a duhthusam a ni a ti a, a theih chin chinah hma lak zel a ni ang a ti.
Home Minister chuan Civil Defence lam tihchak tumin MRHG Directorate-in hma a lak mek thu leh reiloteah Mizoram chhung hmun hrang hrangah phuisui zawka din theih beisei a nih thu a sawi a, MRHG-ah hian a ngheta thawk 200 an awm tling lova, volunteers-te nen 1000 bawr vel an awm a, India ram State tinah an dinhmun hian duhthu a la sam lo hle a, tunah pawh hian MRHG volunteers 11 lak belh an dil mek tih a sawi.
Maj. Zosangliana Hualngo chuan tuna silai an hman lai mek .303 rifle leh sten gun-te chu Mizoram Police-ten an lo pek tawh tho a nih thu leh a hlui deuh tawh avanga silai ṭha zawk an mamawhna a nasat lai taka hetianga pek an ni ta chuan inrintawkna a pek belh bakah, tun aia ṭha leh awmze nei zawka an duty theih phah a beisei thu a sawi a ni.