Skip to content
Home » Chanchinthar » Mobile phone apps hmanga inbumna kawngah police-in fimkhur turin mipuite a ngên

Mobile phone apps hmanga inbumna kawngah police-in fimkhur turin mipuite a ngên

Tunhnaiah mobile phone apps hmanga loan pe thei anga insawi chung-changah mi tam takin har-satna an tawk a, Mizoram police chuan mitinte fimkhur turin an ngen.

Hemi chungchangah hian Mizoram police chuan thuchhuah siamin, mobile apps leh website kaltlangin loan amount tlemte pek an ni thin an tarlang a, amaherawhchu loan an rulh zawh hnu pawhin payment failed anga chhuanlam te siamin, rul nawn leh tura nawrin nasa taka tihbuai chhunzawm an ni thin. An rulh nawn duh loh chuan an thlalak mawi lo deuh thehdarhsakah te vau niin, hmun thenkhatah phei chuan an chhungte pawh tihbuaiah heng misualte hian an vau thin.

Police thuchhuah tarlan danin, heng apps hi install a nihin, contact number te, gallery etc. te access theihna permission a dil thin a, phone neituin a remtihna a pek dan a zirin heng apps te hian phone neitu nihna hrang hrang, thlalak, audio, video, messages, contact list etc. te a access thei a, chuta data pawimawhte chu misual ten ralkhat atangin an lo la chhawng thei a, chumi hmang chuan anmahni leh an chhungte an vau thin a ni.

POLICE THURAWN

@ Loan pe thei anga insawi application download loh tur.

@ I mobile ah application thar i install in permission pek a ngaih hunah i mimal thil pawimawh access thei lo turin fimkhur ang che.

@ I phone ah nangma download ni lo application a lo in- install em tih enfiah thin ang che.

@ Hetiang thila buaina i tawk a nih chuan ngawihpui mai lovin police hnenah thlen ang che.

@ Mi hman tur bank account hawnna atan i documents hmantir lo la, i SIM pawh tumah hmantir lo ang che. Heng thilte hi misual tan nasa taka hmansual theih a ni.

Leave a Reply

This site uses Akismet to reduce spam. Learn how your comment data is processed.