Ni 2 awh tur ramsa humhalh te laka pawikhawihna chhui leh hmalak dan chungchang inzirtirna (Capacity Building Workshop on Intelligence Collection, Investigation and handling of Wildlife Offence cases) chu nimin chawhma atang khan Chief Wildlife Warden Conference Hall, MINECO, Khatla, Aizawlah neih tan a ni.
He training hi sawrkar laipuia Ministry of Environment, Forest & Climate Change hnuaia peng pakhat Wildlife Crime Control Bureau (WCCB) leh Environment, Forest & Climate Change Department, Mizoram-te tangkawpin an buatsaih a ni.
He training session hi Jitendra Kumar, PCCF & Principal Secretary, EF & CC Dept chuan hawngin, member kalte hnenah lawmthu a sawi a, PCCF hian Mizoram-in nungcha humhalhna atana duan bik hmun Tiger Reserve, National Park leh Wildlife Sanctuary-ten a khuh zau zawng hi Mizoram zau zawng za zela 9.476 % a ni a,. India rampum huapa heng Protected Area laihawl (average) chu 5.02 % a ni a, National average aiin kan san zawk thu sawi a ni. Mizoram hi International border-a awm kan nih avanga nungchaa sumdawnna a hluarzia leh human-animal conflict a nasatzia a sawi a. Hemi vên nana pawimawh ber chu social fencing – ramsa leh nungcha humhalh kawnga mipui nawlpui thinlung hneha an tawiawmna dawn a pawimawh ber tih a sawi a, nungcha humhalh bikna hmun chhehvela chengte’n hlâwkna an lo têl ve theih na’n eco tourism hi a pawi-mawh hle tih a sawi bawk.
He training hi Lalram-mawii Sailo, Chief Wildlife Warden chuan kaihruaiin, Agni Mitra, Regional Director, Eastern Region, WCCB leh a hoten training an pe a, Forest Department mi leh sa mai bakah Police deptt. atangin Officer thahnem tak an tel a, WCCB lam chuan India hmarchhak state-te hi Illegal Wildlife Trade leh demand-ah a sanzia an sawi bawk.
Training ni khatnaah hian India rama nungchaa sumdawnna a kal vel dante leh dinhmunte zir a ni a, a bik takin Samak ki leh Saphu kawra sumdawnna hluarziate zirhovin, ramsa leh an taksa peng dang dân lova sumdawnna an kalpui dante pawh zirho a ni.
He training-ah hian dân pawimawh tak tak Wildlife (Protection) Act, 1972 te, Customs Act, 1962 leh Indian Forest Act, 1927 te zirchianna neih a nih bakah he’ng dânte hmanna tur bikte zir tel a ni bawk.
Wildlife Crime Control Bureau hi Wildlife Protection Act, Chapter IV ‘C’ behchhana din niin, India ramah Regional Office hmun 5-ah a awm a, India ram a dan kengkawhtu department hrang hrangte hnena dân loa nungchaa sumdawnna thil leh a kaihnawihte hrilhhriat a venpui chu a thil tum lian ber a ni.