Samagra Shiksha Mizoram leh Institute of Advance Studies in Education (IASE)-te chuan nimin khan Vocational Interest Research Project-a thawh-dunna tur thuthlung an ziak a, Secondary School zirlaite chu eizawnnaah eng lam kawng zawhtir chi nge an nih tih hriat theihna tura ni a, zirlaite tuina lam leh an kalkawng thlanpui theihna tur research project a ni.
Samagra Shiksha State Project Director (SPD) Lalhmachhuana chuan tunlai khawvelah naupang-ten tui leh nuam ti taka eizawnna kawng an zawh theih tur lam hriat a pawimawh em em a, ram changkangte phei chuan hun rei tawh tak aṭang khan an lo ngai pawimawh tawh a ni a ti a, tuna an project kalpui tur chu Mizo zirlai tam takin an hlawkpui thei dawn a, kan ram zirna atan a ṭangkai hle dawn a ni a ti.
IASE Principal Prof. Lallianzuali Fanai chuan IASE chu Resource & Educational Research & Resource Centre atana thlan an nih hnua an research project hmasa ber tur a nih thu a sawi a, research scholar-te nen he project hi thawh tur a nih thu leh sum senso zawng zawng chu Samagra Shiksha tum tur a nih thu a sawi a. Secondary zirtirtute pawh a kalhmang tur chiang taka hrilh hriat a pawimawh tur thu a sawi bawk.
Thawhdunna thu-thlungah hian Samagra Shiksha aiawhin Lalhma-chhuana, SPD-in hming a ziak a, IASE aiawhin Prof. Lallianzuali Fanai, Principal-in hming a ziak bawk.