Inrinni khan Govt. Aizawl ITI, TATA Motors Ltd. (TML) leh HYUNDAI Motors India Ltd.(HMIL) te chuan motor siam zirna tur thawhhona thuthlung an ziak.
Govt. Aizawl, ITI leh TATA Motors Ltd. hian kum 5 chhung atana inremna siam phawtin hemi hun chhung hian Tata Motors hian khawl leh bungrua thahnem tak ITI hmunah hian dah lutin ITI Zirlaiten anmahni course kalpui lai tibuai lovin TML Training Module an kalpui tel ang a, TML hriatpui Workshop-ah te ITI Zirlaiten Training an kalpui thei dawn a ni.
Hyundai Motor India Limited (HMIL) leh Govt. Aizawl ITI te hian kum 4 atan inremna siam bawkin he hun chhungah hian HMIL hian Module leh Cut-Section Model hrang hrangte, unregistered Car te ITI-ah an chhawp lut ang a, ITI Zirlaiten Hyundai Motor Dealer leh an aiawha dawr hawng te hnenah Practical training an nei thin dawn bawk a ni.
He thawhhona thuthlung hnuaiah hian Govt, ITI, Aizawlin Class Room leh Practical Room changtlung tak zirlaite tan lo buatsaihsakin, ITI zirlaite tana a ṭul anga hman theih turin peih fel nghal a ni.
Thawhhona thuthlung ziakanaah hian TATA Motors Ltd. aiawhin Zothan Auto Works leh Hyundai Motors India Ltd. (HMIL) aiawhin CK Hyundai te an tel a, sawrkar aiawhin LESDE Department Secretary Lalramsanga Sailo a tel ve thung.
Inrinni vek khan Govt. ITI, Aizawlah Mizorama a vawi khat nan ITI zirchhuak mi 143-te pualin Convocation Programme hman a ni. Govt. ITI Aizawl hian kumin kum kal mekah hian Zirlai 384 a nei a ni.