Transport Minister TJ Lalnuntluanga chuan lirthei khu teh turte harsatna sutkian nan endik ngai bikte chu nimin aṭanga thla khat chhung hriatthiam an nih tur thu a sawi.
Transport Minister hian The Motor Vehicles Amendment Act 2019 hman dan tur chungchang Transport Department Director, Traffic SP leh Mizoram Pollution Control Board Secretary-te nimin khan a pisaah a sawipui a, hetah hian lirthei khu endik ngaite hriatthiam an nih rualin lirthei khu endikna neiloa lirthei duh duhnaa tlan erawh a remchan loh thu sawiin, mipuite harsatna sutkian nan Aizawl-a lirthei khu endikna hmun hrang hrangah a tam thei ang ber endik a nih theih nan hmalak a ṭul thu a sawi.
The Motor Vehicles Amendment Act 2019 chu sawrkar thuchhuak anga vawiin, September ni 1 aṭanga kenkawh tura tih a nih avangin tunlai hian lirthei khu teh tura kal an ṭhahnem ṭhin hle a, hei hian lirthei vei vak tan harsatna a siam avangin Mizoram State Pollution Control Board chuan hemi chungchanga zawm tur thuchhuah a siam a, lirthei khu teh tir turte chu zing dar 6 aṭanga dar 8 inkarah lirthei number ziah a, a tahtawlha endik tur a ni a, hetihlai hian tun dinhmunah inziak lût an tam tawh avangin Ningani thleng chu he inkaihhruaina hi a hman theih dawnlo a ni.