US Open khelh mekah Spanish rawlthar, Carlos Alcaraz chuan quarter-final-ah Jannik Sinner hnehin a vawi khatna atan Grand Slam semi-final a thleng.
Kum 19 mi, Alcaraz hian 11th seed Sinner hi 6-3, 6-7 (7-9), 6-7 (0-7), 7-5, 6-3-in a hneh a, third seed Alcaraz hian vawiinah hian Frances Tiafoe nen final luh an inchuh dawn a, Alcaraz hi kum 2005 French Open-a Rafael Nadal hnua mipa Grand Slam semi-final thleng leh thei naupang ber a ni.
American kum 24 mi, Tiafoe pawh hian Grand Slam semi-final a thlen vawi khatna ni turin quarter-final-ah Andrey Rublev chu 7-6 (7-3), 7-6 (7-0), 6-4-in a hneh ve bawk a ni.
Kumin US Open-ah hian a vawi khatna atana Grand Slam champion an awm dawn chiang a, Casper Ruud leh Karen Khachanov-te chu semi-final lehlamah an inkhel dawn a, semi-final pahnih hi Inrinni zing lam (zanin) dar 12:30-ah an khel ve ve ang. Alcaraz leh kum 23 mi Ruud-te hi tournament zawha world number one ni thei ve ve dinhmunah an ding mek a ni.