Ministry of Micro, Small and Medium Enterprises (MSME) chhinchhiah danin Mizorama Industry ding zinga 97.36% chu Industry tenau (Micro Enterprises) an ni a, chung zinga a tam ber chu cheng nuai 10 tling lo senga bul ṭan an ni a, an zinga a chanve (50%) vel chu loan la lovin, anmahni sum khawl aṭanga bul ṭan an ni.
Inrinni khan MSME buatsaihin Dawrpui Multipurpose Centre-ah Mega National SC-ST Hub Conclave neih a ni a, he conclave hi Commerce & Industries Minister Dr R. Lalthangliana chuan khual-lian niin a hawng a, Dr R.Lalthangliana chuan thu sawiin, MSME-in Mizoram mamawh tak MSME tih-hmasawna, tihchangtlunna tur inkawmhona an rawn buatsaih chu lawmawm a tih thu a sawi a, Mizoram hmun tam zawk chu tlangram vek a nih thu sawiin Industry lian tak tak din a rem lo tih a sawi a, bul ṭan tura loan lak kawngah leh thil hrang hrangah kaihhruai kan la ngai hle tih sawiin Ministry lam aṭangin theihtawp chhuahpui tur leh an inkaihhruaina hman laite pawh Mizoram leh India hmarchhak state-te tan tlema thlahdul hlek ṭula a hriat thu sawiin, Bank-ho pawh loan pek chhuah kawngah inhawng zau a, loan dilte pawh rang taka tihchhuah kawngah ṭan la thar leh tura a duh thu a sawi.
Khuallian chuan MSME-in Mizoram tana hma a lo lak tawhnate tarlangin lawmthu a sawi a, Luangmuala leh Lengte-a ruahtui dahkhawlna tur sak nana cheng vaibelchhe 9.72 a rawn pek hmangin thawh mek a nih thu a sawi a, heng bakah hian Flatted Factory Complex pali – IGC Luangmual (Rs 9.98cr), Industrial Estate Kolasib (Rs 14.99cr), IIDC Pukpui, Lunglei (Rs 9.98cr) leh IIDC Zote, Champhai (Rs 9.93cr) te chu MSME Ministry in an ngaihtuah mek thu a sawi.
National SC-ST Hub hi kum 2016 khan prime Minister Narendra Modi chuan a hawng a, a programme-in a tum ber chu India rama Scheduled Caste leh Scheduled Tribe zinga mahni kutkawiha eizawnna ngel-nghet nei duhte bul ṭanna tur atana kawng sialsak leh ṭanpui a ni a, hetiang lama tui leh ngaihven duh tan MSME website https://msme.gov.in/-ah lutin a zirchian theih reng a ni.