ZPM party Leader Lalduhoma chuan, “Corruption chungchangah kohhran a ngawi mai mai ngai lova, vawi engemawzat hma lo la tawhin, kuminah pawh Presbyterian Kohhran bial inkhawmpuiah sem policy leh corruption duhlohna nasa taka sawiho a ni tawh a. Presbytery-ah lut chhovin an rel zel a, ‘Corruption dona kawngah nasa zawkin hma la rawh se’ tih thu kal zel avangin Synod inkhawmpui lo awm tur hian ngaihven a hlawh hle dawn a ni,” a ti.
Nimin khan ZPM Party Office-a ZPM chhung inkhawm neihah he thu hi sawiin, Lalduhoma chuan, “Eirukna leh hlemhletna hrang hrangte kan duh lo takzet a nih chuan 2023 inthlanah mipuiten kan duh lohzia kan lantir a ngai a, Ramhlui zia thlak thei tawh lo, Opposition an nih lai chauha piangthar ṭhinte hi kan hnawl ngam a hun takzet zet tawh a ni,” a ti a, “A thlawna sem, a thlawna dawn leh kut tling lova sum lâk hi Pathian thu kalh tlat a ni a, chuvangin hetiang hmanga vote zawng ṭhinte chu ringtu kan nihna anga kan hnawl a, kan kalsan ngam a hun ta. Kohhran an auchhuak tawh a, tunah chuan kan NGO lian ber YMA pawh an auchhuak leh ta hial a, eirukna leh hlemhletna hrang hrangte hi kan duh lo takzet a nih chuan nakkum inthlanah mipuite’n kan duh loh zian kan lantir a ngai a ni,” a ti.
Lalduhoma chuan, “Sawrkarna siam turin kan inbuatsaih mek a, Mizoramin kan la hriat loh leh hmuh ngai loh thil tha kan hmu mawlh mawlh tawh dawn,” a ti a, an sawrkar chuan an party-in a rel tawh angin CBI an ko lut dawn tih a sawi a, sawrkar ṭha siam turin a taka thawk tur Lok Ayukta dinthar a nih tur thu a sawi a, “Chief Minister-in Works Portfolio a nei dawn lova, hei hi kalphung thar ṭha tak tur a ni. Tunah chuan kan CM ten department hmui hmui an chang tlat zel a, lui chu a hnar atangin a nu leh dawn tih a lang nghal vek a ni,” a ti a, “Kan sawrkarah chuan Chief Minister nih leh Party president nih kawp a rem ve dawn lo a ni. Kan ram dinhmun thlir ila, tam tak chu term khat MLA, minister an ni dek dek a, huan zau pui leh inhmun to tak, in ropui tak an nei nghal thei zel mai hi a mak. Hlawh atang ringawtin hengte neih mai theih a ni lo. Ram mipuite hian kan MLA-te ṭheuh hi bihchiang ila, kan sawi ang mi an nih chuan kan chanai an eiru-ah ngai rawh u,” a ti bawk.