MPCC treasurer aṭanga bânna thehlût Zodintluanga, MLA chuan Congress party chhuahsan tumna a neih loh thu a sawiin, an party ṭhat zawkna atana bânna thehlut a nih thu a sawi.
Zodintluanga chuan Congress Party aṭanga bâng a nih loh thu leh an sawrkar leh ngei theihna atan theihtawp chhuah a tum zel tih a sawi a, Congress Party tan a la ṭang sauh dawn chauh tih a sawi a ni.
Zodintluanga chuan kar leh hian West Phaileng lamah zin a tum thu sawiin, a zin chhan tur pawh Congress Party programme a nih thu a sawi a, a bial lamah pawh an party programme an duan thu a sawi bawk.
Congress-a a MLA pui ṭhenkhatte nena BJP zawm tur anga social media-a sawi awm, ṭhenkhatin ZPM zawm anga an sawi leh BJP zawm tum anga an thehdarh chungchangah a engamah zawm tumna a neih loh thu leh Congress party a sawrkar leh theihna atan theihtawp a chhuah dawn tih a sawi a ni.
Zodintluanga hian Zirtawpni khan MPCC Treasurer a nihna aṭanga banna MPCC President Lalsawta hnenah a thehlut a, President zin lai a nih avangin MPCC Vice President Lal Thanzara’n a dawng a, President hi a a zin avangin engtin nge thutlukna a siam dawn hriat a la ni lo.