Health Minister Dr. R.Lalthangliana chuan an sawrkar chuan a hmaa mite thil tih an chhunzawm ṭhin tih a sawi a, health care bill an release thuai a beisei tih a sawi.

Nimina Aizawla Hnam Run-a thu a sawinaah Dr. Thangtea chuan, “Kan sawrkar hian kan hmaa mite thiltih kan chhunzawm ṭhin. ZMC pawh kan hmaa miten an hawng a, ṭha takin kan chhunzawm. Covid dedicated medical college ni chungin MBBS pass thar 71% kan han neite hi thil ropui tak a ni. Zemabawk cancer superspeciality hospital (cheng nuai sing sarih) tur atana kan hmalakna pawh central-a paltlang ngai kan tifel vek tawh a ni,” a ti.

Health Care chung-chang sawiin Health Minister chuan, “Healthcare pawisa cheng vbc. 70 vel kan ba pawh thla tharah hi chuan budget-a cheng vbc 60 kan dah aṭangin engemaw zat bill kan release ka beisei. ADB project kan tifel a nih phei chuan healthcare bill tâng a awm tawh lo ang,” a ti.

Politics chungchang sawiin, “Party ṭhenkhat chuan felfai em emin, sarafim anga sawrkarna din an tum a, hei hi a theih loh. Keini chuan kan fel loh ang angin mi rethei kilkhawr ber thlengin, zu leh drugs-in a tihbuaite pawh kan enkawl zel ang. Zai thiam chu nasa takin zai mai se. Chutiang bawkin inkhel thiam pawh. Vawi khat pawh minister la ni lo tan CM nih tum ngawt mai chi a ni lo,” a ti.

Social media sawiin, “Social media politics hi a buaithlak khawp mai – Sawrkar thiltih a chhe lai phochhuaka mipui ngaihdan tichiri zawnga thiltih hi tunhmain a awm ngai lo. Belhchian dawl si lova sawrkar tuma sawrkar beihna hi thil ṭha lo tak a ni. MNF pawh kan tlin lohnaah inngaidam tawn ila. Kei ngei pawh hi min ngaidam teh u. Ram mipuite pawhin in beisei kan phak lohnaah min ngaidam teh u,” Dr. Thangtea chuan a ti bawk.