Ram pum huap Gram Panchayat (Village Council) hna thawk ṭha inelnaah Saitual District-a Ngopa Village Council chu pakhatna a ni.
Ngopa VC-te lawmman lak, Nanaji Deshmukh Sarvottam Panchayat Satat Vikas Puraskar hi Ngopa VCP K.Lalremsiama kutah President Droupadi Murmu chuan nimin khan New Delhi-ah a hlan a, lawmman semna hmun Plenary Hall, Vigyan Bhawan-ah hian sawrkar laipuiin a sawm angin LAD Minister K.Lalrinliana pawh a tel a, Sustainable Development Goals chungchanga state sawrkar hmathlir leh chumi tihlawhtling tura hmalakna hrang hrangte sawiin, Mizoramin lawmman ropui tak a lak avangin Central sawrkar hnenah lawmthu a sawi a ni.
Village Council-te enkawltu ber Local Administration Department pawhin Ngopa Village Council-ten ram pum huapa Localization of Sustainable Development Goals Theme pakua (9) tihlawhtling tura hma la ṭha lawmman pakhatna an lâk theih nana Rural Development Department leh line department dangte nena thawhhona ṭha tak an neih avanga lawmawm an tih thu an sawi.
LAD Minister K.Lalri-nliana chuan Ngopa khaw mipuite chu Village Council (Gram Panchayat) tha bera thlan an nih avanga lawmpui-na thu a hlan a, ram pumpuia Village Council 2,55,000 chuang zinga tehfung hrang hranga teh hnua Village Council ṭha ber an ni thei chu Mizoram-in a chhuang tak zet tih a sawi a. India ram state kilkhawr ber, Panchayati Raj Institution hman ve lohnaah Ngopa khua, khawtlang mipui inlungrual leh thawkrim, khawtlang hruaitu tha leh a ngaihna hria an awm chu ram puma Mizoram hmel lanna, Mizote mawina an ni, a ti a. He lawmman dawn theih nana mipui leh khawtlang hruaitu te, Leng-teng bialtu MLA L.Thang-mawia te, Ngopa leh Saitual District-a sawrkar hnathawk te, LAD hnuaia thawktute zawng zawng thawhrimna a chhuan thu leh hetianga thawhhona ṭha an nei chu lawmawm a tih thu a sawi a, Ngopa khuain he hlawhtlinna an chang hian Mizoram khaw dang pawh a tiphur hle nia a hriat thu pawh sawiin, lawmman ṭha tak an dawn theihna tura an hmalakna leh inbuatsaihnaah duhsakna a hlan a ni.
Ngopa VC lawmman lâk hian thuziak leh pawisa fai cheng nuai 150 a keng a ni.