Nizan, tukin zing lam dar 12:30 vel khan Lunglei District Jail atanga tlan chhuak zinga tualthah thubuai nei Lalchawimawia (24), Thangte khua, Lunglei district chu Hnahthial leh Thingsai inkar, Khawhri rama thlam pakhatah man a ni.

Thudawn danin nimin tlai thim hlim vel khan Khawhri khaw daiah ke-a a kal lai hmu an awm a, jail tâng tlan chhuak zinga mi a nih ngei rinhlelhna a awm a, he thu hi an hriat hnuah Khawhri branch YMA chuan hmalak dan tur an ngaihtuah zui nghal a, Hnahthial Police-te pawh hriattir niin, a zan a zanin a awm theihna lai âwmte enfiah turin thu an titlu a, zanah a nih avangin khawi thlamah emaw a riah rin a ni a, zan dar 10:30 velah amah veh tur hian an thawk chhuak ta a ni.

Khua a\anga thlam awm hmasa ber, balhla huan thlamah mei êng an hmu a, hei hi thawm dim takin an hual a, amah hi tâng tlanchhuak a ni ngei a ni tih an la hriatchian loh avangin a vehtute pawh an fimkhur hle a, hemi thu hi Hnahthial police-te hrilh lehin, Hnahthial Police-te lo thlen hnuah thlamah hian luhchilhin, thlama a mu lai chu an man ta a, Lalchawimawia pawh hi a lo fimkhur ve hle a, amah pantu an awm leh awm loh a hriat theihna turin thlam panna kawnga kalten an rah rik turin hnah ro a lo dah a, mahse harsatna awm lovin thlamah luhchilhin an man a, amah pawh hi a lo \ang lem lo niin thudawnna chuan a sawi.

Lalchawimawia hi man a nih hnu hian Hnahthial Police-ten la nghalin, Lunglei District Jail-ah dahluh leh nghal a ni a, heti hian ni April ni 19, 2023-a Lunglei District Jail a\anga tlan chhuak mi 5 zinga mi 3 chu man an ni leh ta a, ni 21 April, 2023 khan Zokhawthar mi ve ve Dokapthanga leh Lalbawihliana-te chu Mausen daia hotel pakhatah man an lo ni tawh a, tang tlan chhuak zinga mi pahnih ruihhlo kaihhnawiha man ve ve – Hauhdeihchhin (25) Tlangnuam, Champhai District leh Vanneihthanga, Leisen, Myanmar-te chu man lohin an la awm a, anni pahnih pawh hi ngawrh taka zawn zui zel an la ni.

Nizana tang tlanchhuak an man hi kum 2021-a kum 52 mi, K.Vanlalduati, Lunglei chanmari thattua puh a ni.