India hmarchhaka a hmasa ber leh lian ber tur, ni zung chakna hmanga kawlphetha Mega Watt 20 pe chhuak thei Vankal Solar Park, cheng nuai 2,107 senga din chu Power & Electricity Minister R.Lalzir-liana’n nimin khan a hawng.
Vankal Community Hall-a hawnna inkhawm buatsaihah P&E Minister chuan Vankal Solar Park puitlin a nih theih nana ram petu Vankal khawtlang mipuite chhuanawm a tih thu a sawi a, hripui leng avanga hna a khaihlak hnuah Department leh hnathawktute’n theihtawp an chhuah leh, sawrkar hmasa aṭanga ruahmanna awm tawh sawrkar tharin chhunzawma Vankal Solar Park hawn a ni ta chu lawmawm a tih thu a sawi.
He hunah hian Human Resources Development Board Vice Chairman Dr. L.Thangmawia chu khualzahawm a ni.
Vankal Solar Park hi State Sawrkar sum cheng nuai 1707 leh Sawrkar laipui Ministry of New & Renewable Energy (MNRE) sum cheng nuai 400, avaiin cheng nuai 2107 senga din a ni a, kum 2018 August thlaah lungphum phuma bulṭan niin, hripui leng avanga hna a khaihlak avangin a zawh hun tura ruahmanah zawh hman a ni lo a, kumin February ni 16 khan hlawhtling taka trial commissioning tih niin, thla hmasa ni 18 khan Commercial Operation tih ṭan a ni.
Vankal Solar Park-ah hian power lak luh leh pek chhuahna tur 232/33 kV Sub-Station leh Control Room-te bunfel niin, hmun dang aṭanga power lo kal nen thlunzawm a ni a, Mizoram puma hman theih tura ruahman a ni.
M/S Sunfree Northeast Renewable Energy Pvt. Ltd. chuan Power MW 15 siamna tur buaipuiin, M/S ATA Renewable P4 Pvt. Ltd. chuan Power MW 5 siamna tur an buaipui bawk a, hawn a nih hnu kum 25 chhung enkawl hna Company-te’n an thawk chhunzawm dawn a, hemi aṭanga power siam chhuah hi Mizoram sawrkarin man tlawm zawkin, Rs.3.94/unit-in a lei thei dawn a, tunah hian phai lam aṭanga lei aiin unit khatah Rs.1/- aia tam zel state sawrkarin a hum thei tih sawrkar thuchhuah chuan a tarlang.