PC Party chuan kumin MLA inthlanpui atana campaign bul ṭanin nimin khan an party office atana an hman lailàwk party Treasurer Office,Treasury Square, Venghlui-ah President Vanlalruata’n campaign pamphlet a tlang zarh.

Vanlalruata chuan thu sawiin, “PC Party hi milian muthlu an sawi angin hun rei tak chu mihring nei ṭeuh siin che hlei thei lovin kan awm a, tunah chuan kan lo tho chhuak leh ta a; Mizorama Party office nalh, changkang leh nuam ber tur sak hna kan thawk ta mup mup a ni. Hemi atan hian tha leh thawhlawm pawh lut zelin kan hmaa inthlan lo awm turah hian dinhmun pawimawh tak kan chang chho dawn a ni, ” tiin, ṭan la zual turin party mi te a fuih a, “Hetianga kan thawh chhoh mêk lai hian ram siamṭhat leh tihhmasawn duhtu tan kan hnenah hmun a awm a, lo kal ula, kan ram hi siamṭhain tihmasawn tak tak turin hma i la tlâng ang u,” tiin sawmna a siam bawk a ni.

Nimina tlangzarh campaign pamphlet-ah hian inthlan lo awm tura PC Party auhla tur tlangpui ziah a ni a, PC Party chu ram mamawha innghat policy nei a nih thu te, ram inawp leh inrelbawlna siamṭhat chungchang te, electricity power siamchhuah leh internet ṭha neih te leh Human Rights Commission leh Labour Court din chungchang te, ram economy tungding tura khawl hman uar chungchangte a awm a, Pamphlet hi semchhuah nghal a nih bakah chak taka sem chhoh tura ruahman a ni.