Zothlifim Logo
Loading ...

ṭNimin khan Excise & Narcotics minister Er. Lalrinawma, Ruihhlo Do Working Committee Chairman ni bawk chuan Ruihhlo do khuh hwnna hun Assembly Annexe Conference Hall, Aizawla neih chu khuallian niin a hmanpui a, he hunah hian ruihhlo dona atana hman turin cheng vaibelchhe 3 sem ral a ni.


Ruihhlo Do khuhawnna inkhawmah hian thu sawiin, Er. Lalrinawma chuan ruihhlo leh a kaihhnawih harsatna hian Mizoram min rûn nasa hle a, ruihhlo hmansual leh dân lova tawlhrûk hian mimal leh khawtlang nun a tichhiain, hmasawnna kawng hrang hrang a tiṭhuanawp a, pawikhawihna leh dân bawhchhiatna a thlen nasa hle tih a sawi a, Chief Minister Zoramthanga hmalaknain nikum, 2022 May thla khan ‘Core Committee on Ruihlo do’ neih a lo ni tawh tih sawiin, Committee-in a lo rel angin Social Welfare Minister chairman-na hnuaiah working committee din nghal a ni a, ruihhlo dona kawngah chak zawk a hmalak a nih theih nan Supply reduction, Demand reduction leh Harm reduction-te mumal taka do leh thawhho a ṭul tak zet a ni tih a sawi.


Core Committee chairman Chief Minister, Zoramthanga, Finance Minister ni bawk remtihpuinain thawhho dan turte ruahmanna siamin, sum mamawh zatte duan a ni a ti a, Working committee hi vawi-3 an ṭhutkhawm tawh thu a sawi a. Ruihhlo dona atan mamawh ang pek an ni chu lawmawm a tih thu a sawi a, Working committee ruahmanna angin District tinah DC kaihhruainain Task Force din a ni tawh a, anni hian District leh Village level-ah ruihhlo dona kawngah hma chak takin an la dawn a, chutih rualin he ruihhlo dona kawngah hian NGO, khawtlang, chhungkua, mimaltin ṭanrual a ngai tak zet tawh a ni a ti bawk.


He hun hi R.Lalngheta, President, CYMA leh Vice Chairman Ruihhlo Do Core Committee chuan kai-hruaiin, Rev.R.Lalrintluanga , Vice-Chairman, MKHC-in hunserh a hmang a, Prof. Lalnuntluanga Secretary, Ruihhlo Do Core Committee hnen a\angin report ngaihthlak niin, Lalbiakthanga Khiangte, IPS, IGP(Law & Order), Mizoram Police-in lawmthu sawiin hun a khar a ni.


He hunah hian ruihhlo dona atan hman turin NGO, Department leh District hrang hrang Deputy Commissioner-te hnenah Rs 3,00,00,000/- (vbc 3) sem ral a ni a, he hunah hian District hrang hrang DC leh SP, Mizoram Police, Excise & Narcotics Dept. Food & Drugs Administration, MSACS, CYMA, CYLA leh MTP aiawh an tel a ni.