Nimin khan New Serchhip South VC-ten New Serchhip BRTF Camp hluia Futsal Ground an siam chu Rengliana, VCP, New Serchhip South chuan mipui hman theih turin a hawng.


Hawnna inkhawm tawi Futsal Ground thara hmanah hian Rengliana chuan VC inthlan dawnah party hrang hrangten Futsal Ground siam chu an manifesto-a an telh thu a sawi a, tunah hian New Serchhip South VC-ah MNF-in seat 4 hauhin, Congress-in seat 2 leh ZPM-in seat khat an neih thu sawiin, Futsal Ground siam chu an manifesto tihhlawhtlinna pakhat a nih thu a sawi a, Futsal Ground hmanna a\anga an sum an hmuhte pawh Lengin Health Care Scheme an kalpui chu tluk chiah lo mahse hriselna lam leh damlo a mamawhtute hman theih tur atan leh khawtlang mamawh dinna tur atana hman tura ruahman a nih tur thu te, hmabak nei naupangten hma an sawn zelna tur chu ngaih pawimawha an neih thute sawiin, hemi chungchang ngaihtuah tur hian YMA lamte nen committee din tum a nih thute a sawi.


Ṭhuamliana, VCM kaihhruaia hawnna hun hmannaah hian Lalliana, VCM chuan hunserh hmangin, report petu VC Secretary Ramdinmawia Ralte tarlan danin, Futsal Ground siamna atan hian cheng nuai 53.88 sen a nih thu leh, sawrkar aṭangin a hrana sum hmuh a awm loh thu te, an sum neih sa bakah bank loan cheng nuai 15 lak a nih thute ngaihthlak a ni a, ground hi a dung metre 42 leh a vang metre 28 niin, thirlen hmangin ft. 15-a sanga hung chhuah a ni a, khelmual bik hi international standard-a a zau thei ber, a dung metre 40 leh a vang metre 20 niin, Artificial turf phah a ni a, zan lama inkhelh theih turin LED light 100watt 18 dah a ni a, power supply khaihlak changa hman theih turin Generator 3.5 kVA dah a ni bawk a ni.


Ground hi a duh apiang hman teih tura ruahman niin, zing dar 5 leh tlai dar 5 inkarah darkar khat zelah ₹500/- leh, tlai dar 5 aanga zan dar 11 thlengin darkar khat zelah ₹1,000/-a hman theih a ni a, tournament siam duh an awm chuan chhun leh zana hman hun chhung atan darkar khat zela a thlawna hmantir an ni ang a, darkar 5 chhung hmangte tan darkar khat zel a thlawna hman theih a ni dawn bawk a, Inrinni leh sawrkar chawlh zing dar 10 leh chawhnu dar 3 inkarah book an awm loh chuan kum 15 hnuai lam tan darkar khat zelah ₹200/-a hman theih a ni dawn bawk.

Nimina hawnna hunah hian New Serchhip South VC leh MJA, Serchhip District bakah, New Serchhip Venglai Branch YMA leh Chhekhnai Branch YMA-ten friendly match an khel a ni


Ground hmang duhte tan New Serchhip South VC Secretary (Ph. No. 9436453356/9366007356)-ah dil theih a ni.