Zothlifim Logo
Loading ...

Thawhṭanni zan April ni 24, 2023 zan khan Music Home Zonuam-ah ZPM Fund Raising Committee bultumin ZPM Fund Raising Campaign Kick-Off hun hman a ni a, K.Sapdanga, Working President chuan fund raising campaign kick-off na hun a hmang a ni

Baryl Vanneihsangi, AMC Corporator kaihhruaiah hian K.Sapdanga chuan thu sawiin, “ZPM Party Campaign Committee chuan Zoram hmun hrang hranga mipuite inhawnna te, India ram leh ram danga Zo hnahthlak awmte thlenga inhuamnate a lo hria a, party unit leh block hrang hrang te’n sum tuaka an hnatlangte a hmuhin; hun remchang Campaign Fund thawh theihna siam ṭhain a hria a, he programme hi a lo buatsaih ta a ni,”tiin he hun buatsaih a nih chhan a sawifiah a. “Mipuiten, a bikin ṭhangtharten kan beisei sawrkar ṭha leh rintlak, corruption do ngam tur, mipuite hmai êng zah nachang hria sawrkar kan neih theih ngei nan, a tam lam chu engzat pawh ni se, tlem lua awm lovin, kan remchan ang zat apiang thawh a, Mipui Sawrkar min tuak chhuahpui turin mi tinte kan sawm a, ZPM party hi mawhphur tura min siam phawt chuan, Sawrkar ṭha, sawkar thianghlim mipui sawrkar pek let ngei kan tiam nghal bawk e,” a ti.

ZPM Working President chuan, “Kumin kum tawpah hian MLA inthlanpui kan hmachhawn leh dawn ta. Party ṭhenkhat chuan sum hman tur an neih ngahzia mipui hriatah an puang dum dum a, keini ZPM chu sum hman tur pawh nei ve lo, inthlan dawna puk tur dapa buai viau tur tiin min rum ṭhaih a; an va hre dik em!” a ti a, “Hmun tina kan Unit te hnenah, an biala ding candidate-te chu tlem te tal pawisa lo pai ve turin kan ngen a. Unit ṭhenkhatin huan samin, ṭhenkhatin rawra chhuin, an candidate-te lo puihna tur sum an tuak a, hnatlang inhlawh thlalak te an rawn thawn a, kan hotuten mittui tlain an lo thlir ṭhin. Huan sam a, rawra chhua kan tuak chhuah kan MLA-te chuan mipui min rawk duh hauh lo ang tih kan ring a, ram hmasawnna hna thawhna atana sum lo lutte pawh an lo hlep ru duh hauh lo ang tih kan ring nghet tlat bawk a ni,” a ti.