Nimin khan Serchhip CMO Conference Hall-ah Serchhip District Hospital building thar sak a nih huna damdawi in kalpui dan tur sawiho a ni.
Serchhip Damdawi in building thar sak tura tih chu a hmun ngaia sak tura tih a ni a, hemi chhung hian a bul hnaia building awm, Eye hospital leh eye ward-ahte damdawi in hi kalpui turin Health department-a thawk-ten enfelin ruahmanna an lo siam tawh a, a kimchang zawk erawh chu la duan leh tur a ni.
Damdawi in sak chhunga luah tur hian Tarpitlanga Nursing School chu enfiah a ni tawh a, mahse building hi a chhiat nasat tawh avangin luah theiha siam tur chuan sum sen a tam dawn a, electrification-ah chauh pawh cheng nuai 26 lai sen a ngai dawn a, hei hi hmuh mai theih a ni dawn loh avang leh, thawktute indaih a harsa dawn nia a lan avang te, damlo leh damdawi in mamawhahte pawh harsatna tam tak a awm dawn avangin tuna a awmna bul velah damdawi in kalpui mai ni se tiin rawtna siam a ni tih meeting kaihruaitu Dr. ZD Lalmuanawma, District Medical Superintendent chuan a sawi a ni.
Serchhip Damdawi in ṭhiah a nih chuan Cell hrang hrang siamrem ngai 18 lai a awm a, Health Department ram chhunga building nei Serchhip Kawnpui South YMA, ZDU Sub-Hqrs leh Ex-Servicemen-te pawhin an building chu hman an remti a, Ex-Service leh ZDU-ten luah man an besei chu la inbiak leh nise an ti a, damdawi in building sak ṭhat chhung chuan chep taka inbeng-khawm tur a nih avangin mipui leh thawktute tan dawhtheihna sâng tak neih a ngai dawn a ni tihte sawi-lan a ni a, a ṭul dan azirin meeting la koh leh nise an ti.
Meeting hian CMO Lalzawmi, Doctor-te leh Health staff hotute, NGO, VC leh MJA aiawhte an tel a, meeting thuchhuak hi Health deptt Directorate leh DC hnena thlen leh tur a ni.