Nimin khan ZPM Serchhip Block chuan tunhnaia MNF-in Serchhip bialtu MLA Lalduhoma chu a bial chhung mipuite a bum nia an puh chungchang chhânlêtna thuchhuah an siam.
ZPM Serchhip Block chuan thuchhuah an siamah chuan Lal-duhoma’n Handloom chungchang-ah ‘Company-te nen Agreement kan sign nghal ang’ tia a sawi ang ngeiin DPR siam nan cheng nuai 3 sen niin, Agreement hi signed a ni an ti a, Company lam hian a quality an duh uluk em em a, puan tahtu lam hian Company duh dan ang hi an lo tih dan ṭhin nen a danglam deuh avangin duh angin hmalak a chak thei rih lo mai a ni a, heng avang hian puan tahtute tah ang ang la zel thei tur ‘Lenbuang Enterprises’ nen agreement siam leh tawh a ni a, puan tah sa engemaw zat pawh rei lote-ah lak a ni dawn a, puanbu pawh pek leh zel an ni ang an ti.
Vanva Dam pawh khuah belha Thenzawl Water Supply Scheme atana hman nghal theih tura a sawi chu tunah chuan Deptt. lamin hma la-in Thenzawl tui tlan atana hman a ni tawh tih an sawi a, Thenzawl Hospital-a dah tur Ultrasound, MLA Fund-a lei a tum chungchangah pawh Delhi thlengin Ultrasound lei tumin a zu dawr a, mahse Thenzawl Hospital hian Ultrasound nei thei turin phalna a lo nei lo hlauh mai a, a lei theih ta lo a, Hospital lam hian phalna an nei thei a nih chuan ngaihtuah zui theih a ni an ti bawk.
Thenzawl-in College an neih theihna tura hmalak chungchangah pawh a buaipuitu pawl an awm tih ZPM chuan an tarlang a, MLA Fund-te hmangin kalpui theih mai an inbeisei a, Serchhip College-ah lo hmui turin dil a ni a, College hotute’n an lo phalsak a, mahse engemaw rokhawlhna avangin a reh leh ta rih a, hma lak zui hleih theih a ni ta lo mai a ni an ti a, Lau lui Project leh Thenzawl mi nuai 10 awm theihna khawpuia siam chungchang chu ZPM sawrkar huna hma lak zuina tur leh a hmachhawp a sawi a nih thu an tarlang bawk.
By-election dawna Thenzawl Joint Platform-a Lalduhoma thusawi-ah hian hmalak dan tur chi thum a sawi tih tarlangin, MLA Fund hmanga tih theih/tih tur te, Department-te nena thawk hova tih theih/tih tur te leh ZPM sawrkar huna tih turte a ni an ti a, Lalduhoma MLA Fund hmanga hnathawh a tam hle tih sawiin, a ṭha em em hlawm bawk a, a Fund hmang hian mi harsa leh damlo puih ngai tam tak a ṭanpui bawk a, Department hrang hrang hotute pawh a bial tan a dawr tam hle an ti bawk.
“ZPM Leader – Lalduhoma dawt sawia an puh ṭhin hi sim a hun tawh hle a ni,” an ti a, “Mimal chirhtheha bei vak zel lo hian mipuite hnenah thupha chawi se la, an Party policy-te hi sawi ve mai ṭhin turin kan ngen e,” an ti bawk.