MNF General Hqrs-a Media and Publicity Department chuan ZPM Leader leh Serchhip bialtu ni bawk Lalduhoma’n a bialchhung mipuite a bum nasa tih an sawi.


He thu hi nimina Aizawl Press Club-a thuthar lakhawmtute an kawmnaah sawiin, MNF Gen. Headquarters-a General Secretary VL Kroshnehzova chuan tunhnaia Thenzawl an tlawh ṭumin ZPM Leader, an bialtu MLA Lalduhoma hmalakna hrang hrangte an zirchiang a, inthlan hmaa mipui hmaa a thutiamte a tihlawhtling em? tih chu an enfiah a. Kum 2021, April ni 10 khan MPF Joint Local Forum, Thenzawla buatsaih ah Lalduhoma chuan Thenzawla Handloom-te chu hmasawnna a siamsak dawn niin a sawi a, Private company nen, government organisation pawh a dawr fel tawh thu sawiin inremna ziah chiah hmabak a ni tawh tiin tiam mahse Thenzawl-a Handloom hruaitu ṭhenkhat leh heti lama eizawngte an kawmnaah hetiang zawnga hmalakna engmah a neih an hrelo a ti a, Thenzawl-in College a neih theihna tura hmala tura intiamnaah pawh MLA-in hma a lakna hmuh tur a awm lo niin MNF Gen Secretary chuan a sawi bawk.


VL Kroshnehzova chuan Serchhip bialtu MLA chu Vanva Dam enkawl ṭhat a tiamah hmalakna hmuh tur a awm lo tiin, Thenzawl damdawiinah Ultrasound sawrkarin a tihsak thei lo a nih chuan MLA fund aṭangin a ti nghal dawn nia a sawi pawh tun thlengin dah a la nilo a ti a, Lau lui cheimawi a kum tin fish festival nei thei tura hmasawnna a tiam pawh engmah hmalakna a nei zui lo a ti bawk.


MNF Gen Secretary chuan Thenzawl an zirchiannaah Lalduhoma chuan a bial mipuite dawt a hrilh nasa hle a ti a, mahni bial mipuite pawh dawta a bum duh danah a kuta Mizoram dah ngam a ni lo tih Zoram mipui hriatah an puang tih a sawi bawk.