Zothlifim Logo
Loading ...

Borussia Dortmund chuan Paris khawpuia an mikhualnaah Paris St-Germain hnehin kum 2013 hnua a vawi khatna atan Champions League final an thleng ta.

Semi-final first leg-ah khan an home-ah Dortmund hian PSG chu 1-0-in an lo hneh tawh a, second leg-ah pawh 1-0 bawka hnehna changin, an inkhel pahniha goal thun belhkhawmin 2-0-a hnehna changin Dortmund hian final an lut a ni.

He inkhela goal awmchhun hi Mat Hummels thun a ni a, first half-ah goal a lut lo a, second half-ah inkhel tan atanga minute 5-naah Julian Brandt siam chu Hummels hian yard 5-a hla atangin a tauh goal a ni.
PSG hian kum 2020 khan final an lo lut tawh a, European competition-ah champion-na an la nei miah lo a, Dortmund hian kum 1997 khan final-ah Juventus laka 3-1-a hnehna changin an lo champion tawh a, tun tuma an champion chuan european competition no mawi an chawi tum hnihna tur a ni a, kum 2013 May khan Bayern Munich nen final lo khel tawhin, Dortmund hi 2-1-in an tlawm a, kuminah hian German club pahnihte hi final khel leh thei dinhmunah an ding a, Bayern hian nizan khan semi-final 2nd leg-ah Real Madrid nen an inkhel a, anni pahnih hi first leg-ah 2-2-in an in-draw tawh a, he inkhela a chak zawk zawk hi Dortmund chuan June ni 1-ah Wembley Stadium-ah an hmachhawn dawn a ni.

Edin Terzic naute hi tun season-ah Bundesliga lamah an che tha lo hle a, tunah hian 5-naah awmin, match hnih khelh tur la awmah champion tawh Bayer Leverkusen aiin point 24 ngawtin an hniam zawk a, tun season Champions League khelh tan pawh khan final an thlen loh ringtu hi a tam zawk an nih a rinawm. PSG, AC Milan leh Newcastle-te nen group khatah an awmho a, group winner niin knockout stage an lut a, last 16-ah PSV Eind-hoven hnehin, quarterfinal-ah Atletico Madrid an hnawtchhuak bawk a ni.