Serchhip District chunga awm, Kanghmun South Branch YMA chuan an Branch YMA kum 50 tlin champha, Golden Jubilee lawmna pui ber chu nimin khan Kanghmun South Community Hall-ah hmangin, he hun hi District Bawrhsap David Lalthantluanga, IAS chuan khuallian niin a hmanpui.
He hun hmanpuitu David Lalthantluanga chuan thusawiin, Kanghmun South Branch YMA-in kum 50 an tling thei chu lawm-awm a tih thu sawiin, YMA chu Mizo zawng zawng huapzo, political party leh Kohhran zawng zawng lenna a ni a, hetiang pawl dang hi a awm lo a, kan chhuang hle tur a ni a, YMA member-ten enge kan khaw tan, kan District tan, kan ram leh hnam tan kan tih theih inzawt theuh tura a duh thu a sawi a, YMA Motto leh thil tumte hre reng a, hma lam pan zel turin a chah a ni.
District Bawrhsap chuan ruihhlo dona kawngah tan lak nasat a tul thu sawiin, Mizo thalai zingah ruihhlo vangin kum naupang taka thi an tam tawh tih a sawi a, Mizoram rûn mektu ruihhlo do tur hian sawrkar leh YMA mai bakah, chhungkua leh mimal tinte an pawi-mawh a ni, a ti a. Zirna chung-chang pawh sawiin theih-tawpa tan la turin DC chuan kalkhawmte a fuih bawk.
Kanghmun South Golden Jubilee hi Nilaini atang khan lawm tan niin, nimin khan a lawmnapui ber neih a ni a, hun hman hmain khuallian chuan Jubilee lungphun a hawng a, khual-zahawm Lalnungrenga, DFO, Thenzawl chuan Jubilee Flag a pawtpharh a, hemi hnua Kanghmun ‘S’ Br. YMA President R.Lalhmunsiama kaihhruaia Community Hall-a hun hmannaah hian Golden Jubilee Souvenir an siam chu Serchhip Sub-Headquarters YMA President Kawlthuama’n a tlangzarh a, Golden Jubilee lawmna hunah hian member boral sunna hun leh hruaitu lo ni tawh chawimawina hun hmangin, Khuallian leh Khualzahawm bakah Sub-Hqrs. YMA President leh Vantawng Group YMA President C.Lalnunthara-ten thu an sawi a, ran lukim talhin, tlaiah jubilee lawmna ruai an theh a ni.