Zothlifim Logo
Loading ...

Nimin khan Serchhip Kawnpui VC Hall-ah Serchhip Town Development Committee executive meeting neih niin, NH-54 kawng siam mekah khawchhung Kikawn to Sailiamkawn siamthat (resurface) leh tihzauh a nih theih nan hmalak nise an ti.

An chairman V.Rozamliana kaihhruaia STDC executive meeting hian thu hrang hrang an rel a, an thurel zingah Leisekawt field zauh nana laih tawhah BDO Office sak tum Serchhip District NGO Coordination Committee-ten an remti lo chu tha an tih thu sawiin, Chief Minister hmasa Zoramthanga hoa meeting-in 2nd phase-ah BDO quarter tlang rawt nise a lo tih tawh chu, a hlawhtlin ngei theih nan chak taka bawhzui nise an ti a, AOC Venga Soil & Water conservation quarter ram chu an department miten an hmang tangkai tawh loa hriat a nih avangin khawtlang tan dah a nih theih ann hma lak nise an ti a, Venglaia PWD ram pawh February ni 18, 2023-a CM Zoramthanga’n mipui tana hlan a nih thu a sawi tawh angin vantlang tan dahfel a nih theih nan hma lak nise, an tio bawk.

Hei bakah hian Chhiahtlang khaw chhunga engemaw harsatna avanga kawng la laih zawh loh chu a nihna tur anga siam a nih theih nan hmalak nise an ti a, MHIP Sub Hqrs Serchhipin Office hmun tur ngaihtuahpui tura SDTA hnena ngenna an thehluh chu a remchan dan ang zela ngaihtuahpui nise an ti a, an thurel leh thil tul dang sawi pui turin bialtu MLA, Chief Minister ni bawk Lalduhoma kawmna hun ngaihtuah ni se an ti bawk.